د ملي ټرمېنالوژۍ تعريف
ملي ټرمينالوژي د يوه هېواد له نامه نه نيولې تر ټولو لويو او وړو چارو پورې تثبيتيږي او د يوه ملت د ملي مشخصاتو بڼه غوره کوي، دا هم د يادونې وړ ده چې د ملي ټرمينالوژۍ بنسټ د هر هېواد ملي ژبه وي او د يوه ملت ملي ژبه د دې ملت د اکثريت ژبې ته وايي، یا په بله وينا ملي په قوم او ملت پورې اړوند يا تړلې ټرمينالوژي انګليسي کلمه ده په پښتو کې نومونې او په عربي کې اصطلاحات ورته وايي، هغه کلمې، چې د هېواد په ټولو ژبو کې يو ډول کارول کيږي ملي ټرمينالوژي بلل کيږي.
دا نومونې په هغو هېوادونو کې رامنځ ته کيږي، چې څو ژبې ولري هغه هېوادونه، چې يوه ژبه لري په هغو کې دا نومونې نه شته په څو ژبيزو هېوادونو کې بايد دا اصطلاحات وټاکل شي او ټول ملي نومونه واحد وي تر څو ګډوډي رامنځ ته نه شي او که هر څوک په خپله خوښه په هره ژبه کې نومونې وکړي نو ګډوډي رامنځ ته کيږي د دې کار له پاره بايد يوه ژبه ملي وټاکل شي ملي د يوه ولس بومي ژبه کېدای شي چې په زيات شمېر هېوادونو کې د اکثريت خلکو ژبه ملي هم وي او رسمي هم، خو که نورې رسمي ژبې په هېواد کې موجودې وي هغه به يوازې رسمي وي نه ملي که داسې نه وي او هر څوک په هره ژبه کې نومونې رامنځ ته کړي نو دا کار به په هېواد کې د سترې ګډوډۍ لامل وګرځي، ملي نومونې ( ملي ټرمينالوژي) د يوه واحد ملت استازيتوب کوي.
لکه څنګه چې هر هېواد خپلې ځانګړې سياسي پولې لري او پر هغو باندې تیری د هېواد پر استقلال باندې له تيري سره سم دی او هغه ته بې احترامي او پرديو، په تېره بيا د ګاونډيو هېوادونو په ګټه له خپل کلتوري هويت څخه تېرېدل، په اوږد مهال کې د هېواد استقلال، حاکميت او هويت له خطر سره مخامخ کوي.
انګليسي نړيواله ژبه ده او د نړۍ په يو شمېر هېوادونو کې ملي او رسمي ګڼل کيږي، خو بيا هم هر هېواد هڅه کړې ده، چې انګليسي ته خپل ملي رنګ ورکړي امريکايان (Center) ليکي، خو انګريزان بيا (Centre)او حتی ځينې کلمې چې په يوه شان ليکلي په تلفظ کې يې تغيير راولي انګريزان يې ځينې توري نه تلفظ کوي چې دوی ورته(Silent) وايي د بېلګې په توګه (Palm) (ورغوی) امريکايان (پلم) تلفظ کوي خو انګريزان يې همدا ډول ليکي مګر (پم) يې تلفظ کوي دا ځکه چې دواړه خواوې غواړي، خپل کلتوري هويت ولري.
انګلستان او امريکا يو له بله په زرګونو کيلومتره لرې پراته دي او دغه امريکا په تاريخي لحاظ، د انګلستان ادامه ده او دا امکان شته، چې يو بل ته خطر پېښ کړي، خو بيا هم د يوې واحدې ژبې انګليسي، په کارونو کې توپير ته قايل دي. انګريزان وايي: (موږ به له امريکا سره هر څه شريک کړو خو د برتانيې انګليسي ژبه به هيڅ وخت ورسره شريکه نه کړو.)
