يوولسمه ماده: د استازوالۍ د غړو شمېر
۱- د استازوالۍ د غړو د شمېر په اړه د هوکړې د نشتون په صورت کې منونکی دولت کولی شي، چې خپلې کورنۍ اوضاع ته په کتو او د استازوالۍ د چارو په پام کې نېولو سره د استازوالۍ د غړو شمېر لېږونکي دولت ته په ګوته کړي.
۲- منونکی دولت کولی شي چې له توپيري او تعبيضي چلند پرته د يوې ځانګړۍ ډلکۍ مامورينو له منلو ډډه وکړي.
دولسمه ماده: د استازوالۍ له ځای بهر د دفترونو جوړول
لېږونکی دولت نه شي کولی چې د استازوالۍ د دفتر بيرون د منونکي دولت له څرګندې هوکړې پرته کوم بل ځای کې دفتر پرانېزي.
ديارلسمه ماده: د استازوالۍ د مشر د کاري دورې پيل
۱- وروسته له هغې چې د استازوالۍ مشر خپل باور ليک د منونکي دولت بهرنيو چارو وزارت يا بل اړوند وزارت/ادارې ته تسليم کړي، نو رسمي دنده يې پيليږي. د باورليک کاپي منونکي دولت ته لېږي او هلته په ورتګ سره يې کار شروع کيږي.
۲- باور ليک يا د باور ليک په کاپي کې د استازوالۍ د مشر د ورتګ ورځ او نېټه په ګوته شوې وي.
څورلسمه ماده: د استازوالۍ د مشرانو/رئيسانو پوړيز وېش
۱- د استازوالۍ مشران په درېيو لاندې پوړيو يا طبقو وېشل شوې دي:
الف- سفيران او نونسان (د پاپ لومړۍ درجه استازي) چې د لېږونکي دولت، د دولت د مشر استازي دي؛ د استازوالۍ نور رئيسان چې د سفير يا نونس سره مساوي وي.
ب- استازي، مختار وزيران او انترنونسان (د پاپ دويمه درجه استازي) چې د لېږونکي دولت د مشر استازي دي.
ج- چارسمبال یا شارژدافير چې د منونکي دولت د بهرنيو چارو وزارت استازوالي کوي.
۲- له تشريفاتو او هرکلي پرته، د استازوالۍ د رئيسانو يا مشرانو په مقام کې هېڅ ډول نور توپير شتون نه لري.
پنځلسمه ماده: د استازوالۍ د رئيسانو د طبقو په اړه هوکړه
دولتونه د خپلو استازواليو د رئيسانو د طبقو په اړه په خپلو کې سره هوکړې کوي.
شپاړلسمه ماده: د استازوالۍ د رئيسانو د کار پيل
۱- د استازوالۍ رئيسان چې د هر ټولګي اړوند وي د ۱۳مې مادې اړوند په ټاکل شوې نېټې او ورځ دنده پيلوي.
۲- د استازوالۍ د يو رئيس په باور ليک هغه بدلون چې د نوموړي/نوموړې ټولګی/طبقه په کې تغير ونه کړي نور يې په وړاندې کولو کې کوم توپير نه راځي.
۳- دغه ماده د پاپ د استازي د کار پيل سره چې منونکی دولت يې کوي يا به يې په راتلونکي کې کوي، کوم اغېز نه لري.
اووه لسمه ماده: د ډېپلماټيکو استازواليو د غړو ترمنځ وړاندې کونه
د استازوالۍ رئيس ډېپلماټيک کارمندان بهرنيو چارو وزارت يا بله کومه اداره چې دغه کار لپاره ټاکل شوې ده، وړاندې کوي.
اتلسمه ماده: د استازوالۍ د رئيسانو د منلو تشريفاتي مراسم
په هر دولت کې د استازوالۍ د رئيسانو د منلو تشريفات او دا چې د استازوالۍ رئيسان د هر ټولګي اړوند وي، بايد يو ډول اوسي.
نولسمه ماده: لنډمهاله شارژدافير
۱- هر کله چې د ډېپلماټيکې استازوالۍ د رياست مقام خالي وو او يا هم د استازوالۍ رئيس ونه شي کولی چې خپله دنده پر مخ يوسي، نو پر ځای يې يو چارسمبال د لنډ وخت لپاره ټاکل کيږي چې کاردار موقت يا Charge d’ affaires interim ورته وايي. د چارسمبال نوم د استازوالۍ د مشر يا هم د لېږونکي دولت د بهرنيو چارو وزارت له خوا د منونکي دولت بهرنيو چارو وزارت يا هرې بلې هغه ادارې ته ورکول کيږي چې دې برخه کې ورته مسووليت سپارل شوی وي.
۲- که چېرې د لېږونکي دولت هېڅ ډېپلماټيک کارمند په استازوالۍ کې شتون ونه لري نو لېږونکی دولت کولی شي چې د منونکي دولت په هوکړې سره د استازوالۍ د اداري او فني کارمندانو څخه کوم يې د استازوالۍ د چارو د پر مخ وړنې لپاره وټاکي.
شلمه ماده: د بيرغ پورته کول او د نښان لګول
استازوالي او د استازوالۍ رئيس کولی شي چې په خپله د استازوالۍ دننه، د استازوالۍ د رئيس د اوسېدو ځای او وړونکو وسايلو باندې د لېږونکي دولت رسمي بيرغ او نښان ولګوي.
