ولسمشر يې جنازې ته اوږه ورکوي، خو حکم خان حبيبي يې په خوست کې انځور او فاتحه نه غواړي
ډاکټر نېک محمد ويال د روهي وېب پاڼې څښتن
تېره ورځ رسنيو د خوست ولايت څخه هغه وېډیو خپاره کړه، چې والي حکم خان حبيبي، په ولسي جرګه کې د هلمند د خلکو د وژل شوي استازي عبدالجبار قهرمان په اړه توندې خبرې کوي. د موضوع جريان داسې وو، چې په خوست ولايت کې د کندهار د امنيه پخواني قومندان جنرال عبدالرازق او د ملي امنيت رئيس جنرال عبدالمومن حسن خېل ته د فاتحې مراسم نېول شوي وو په لګولو شوي بېنرونو کې د عبدالجبار قهرمان انځور نه وو. په ناسته کې د همايون همايون په شمول د عبدالجبار قهرمان ملاتړو او مينوالو نيوکه وکړه، چې نوموړی هم د افغان خاورې بچی دی، انځور يې بايد نصب وای او د فاتحې مراسم ورته نېول شوي وای. دغه کسانو د اعتراض په ډول لګول شوي بېنر لېرې کړ او ناسته جنجالي شوه.
په ياده ناسته کې خوست والي حکم خان حبيبي په تونده لهجه وويل، "جبار قهرمان که د هر چا لپاره قهرمان وي، خو زما لپاره قهرمان نه دي." د والي په همدې خبرې سره ناسته او د فاتحې مراسم ګډوډ شول او خلک له تالار ووتل.
اوس موضوع دلته نه ده، چې جبار قهرمان، خوست والي حکم خان حبيبي او د همايون همايون په نوم په ولسي جرګه کې د خوست د خلکو استازی څه ډول ګوندي مخېنې لري او په اوس وخت کې يې پلانونه څه دي. د موضوع په دې باندې څرخي چې محمد اشرف غني د هېواد د ولسمشر، جنرال طارق شاه بهرامي د ملي د وزير او ويس برمک د کورنيو چارو وزير په حيث؛ د جبار قهرمان جنازي ته ورځي او په مرګ يې خواشيني ښيي. خو د همدې مرکزې حکومت له خوا په خوست کې ټاکل شوی والي او د ولايتي ادارې مشر، حکم خان حبيبي له خپل دولتي مقام څخه په ناوړه ګټې سره ګوندي موخې او دښمنۍ لټوي. والي دا حق نه لري چې د حکومت د استازي په توګه په ياد ولايت کې ګوندي خبرې مطرح کړي او ورڅخه سياسي ګټې واخلي. د شخص په ډول نوموړی حق لري چې خپل سياسی لوری ځان ته وټاکي، د يو چا ملاتړ او د يو چا مخالفت وکړي، خو په دولتي څوکۍ کېنستل، بيا د نوموړي ليدلوری هم ټاکلی کوي او بايد په پاملرنې سره حرکت او اقدام وکړي.
دغه کس له دې وړاندې هم په خوست ولايت کې ګوندي مسايلو ته لمن وهلې وه او په بشپړ ډول يې د يو لوري ننګه کړې وه. دا هغه وخت وو چې يو شمېر ځوانانو په ياد ولايت کې د پخواني افغان ولسمشر ډاکټر نجيب الله انځور د يو پارک په دروازه نصب کړ او نوموړي مخالفت وښوود او ياد عکس يې هم لېرې کړ.
د خوست په ګډوډۍ کې له والي پرته يو شمېر نور کسان لکه د پارلمان غړي هم لاس لري او خپلې ګټې په کې لټوي. په ۲۰۱۴ز کال کې د خوست والي عبدالجبار نعيمي وو. نعيمي او په ولسي جرګه کې د خوست دوه استازي، همايون همايون او کمال ناصر اصولي سره دومره نېږدې وو، چې په يو او بل يې په تقديرپاڼو او ستاينليکونو نازول. خو چې لکه د يادو کسانو شخصي ګټې په خوست ولايت سره په ټکر کې شوې، نو په خپلو کې يې سره ښکر ورکړل او خوست يې داسې په يوې غميزې بدل کړ، چې په تر شلو زيات کسان په کې ووژل شول او په لسګونه نور ټپيان شول.
د پرون ورځې په قضيه کې همايون همايون هم په بشپړ ډول ښکېل وو، نو مرکزي حکومت او خوستيو ولسونو ته په کار ده، چې د خوست نوم او امن وساتي او اجازه ورنه کړي، چې فسادګر او معامله ګر کسان دا ولايت د وينو په ډنډ بدل کړي.
