ته څه وې؟
شمس رحمانزی
-------------
ته څه وې، ته مې زړه د زړګي سر وې
ته څه وې، ته مې ديد ته مې نظر وې
ته څه وې، ته مې ژوند، ته مې جنون وې
ته څه وې، ته مې لار ته مې سفر وې
ته څه وې، ته وصال وې راسره وې
ته څه وې، ته دلبر له درد خبر وې
ته څه وې، ته ياغي له زمانې وې
ته څه وې، ته له هره خنډه بر وې
ته څه وې، ته مې درد باندې دردمن وې
ته څه وې، ته په غم شريک دلبر وې
ته څه وې، ته اميد، سبا او هيله
ته څه وې، ته له هيلو ډک سحر وې
ته څه وې، ته بې ساری محبت وې
ته څه وې، شمس ته ستوري، سپوږمۍ لمر وې
