د قرغېزستان لویې څارنوالۍ د دې هېواد د سیاسي اپوزېسیون یو مخکښ مشر عمر بېک ټیکیباییف چې د ولسمشرۍ د راتلونکو ټاکنو لپاره یو احتمالي کاندید ګڼل کېږي، د یکشنبې په ورځ سهاروختي د بشکېک هوایي ډګر ته له رسېدو سره سم د رشوت په تور نیولی دی.
د لویې څارنوالۍ دفتر ویلي چې د اتا مکین یا د وطن ګوند له مشر څخه څېړنې پیلوي.
نوموړی په ویانا کې د اروپا د امنیت او همکارۍ د سازمان په پارلماني اسمبلۍ کې له ګډون وروسته د استانبول له لارې بېرته قرغېزستان ته راستنېده چې د بشکېک په هوايي ډګر کې پولیسوونیو.
۵۸ کلن تیکیباییف چې پخوا د ولسمشر الماسبیک اتمباییف متحد و، تېر دوبی وروسته له هغې په یوه مخکښ سیاسي مخالف بدل شو چې په اساسي قانون کې پر یو لړ بدلونونو یې انتقاد وکړ.
د هغه په وینا دغه بدلونونه به د ولسمشر اتمباییف نژدې متحدینو ته زمینه برابره کړي چې وروسته له هغې چې په ۲۰۱۷ میلادي کال د ولسمشر دوره پای ته رسېږي، د هغه متحدین قدرت په لاسکې واخلي.
په اساسي قانون کې دغو تعدیلاتو د صدراعظم صلاحیتونه هم ډېر کړي چې ورسره داسې ګنګوسې راپورته شوي چې ښایي اتمابیف به د حکومت نوی مشر شي یا به هم پر دغه پوسټ خپل یونېژدې متحد وګوماري.
ټاکل شوې ده چې قرغېزستان کې د روان ۲۰۱۷ میلادي کال د نومبر په ۱۹ د ولسمشرۍ ټاکنې ترسره شي.
د قېرغزستان لویې څارنوالۍ ویلي چې د اتا مکین Ata Meken یا وطن ګوند پر مشر عمر بېک تیکیباییف د رشوت تورونه هغې دورې پورې تړلي چې نوموړي د ۲۰۱۰ میلادي کال د انقلابوروسته د مؤقت حکومت د مرستیال صدراعظم په توګه دنده ترسره کوله.
پر تیکیباییف د لګول شوو نورو تورونو ترڅنګ دا تور هم پورې شوی چې هغه له روسي سوداګر لیونید ماییوسکي څخه چې هغه د الفا تیلیکم شرکت د مشر په توګه دنده ترسره کړي، د یو میلیونډالرو رشوت غوښتنه کړې وه. تیکیباییف دغه تورونه ردکړي دي.
د هغه د ګوند غړي او یو شمېر نور منتقدین دغه قضیه سیاسي ځپنه بولي چې په وینا یې ولسمشر او د هغه ملاتړي یې د ۲۰۱۰ میلادي کال د مؤقت حکومت د غړو په وړاندې پر مخ وړي.
