ژوند انګور د شمالي دی
ژوند انار د کندهار دی
ژوند تصویر د بادام باغ دی
ژوند نارنج د ننګرهار دی
ژوند اتڼ دی د ژڼکیو
ژوند د (ادماممد) مېله ده
ژوند دره د استالیف ده
ژوند ښایسته شکردره ده
ژوند د ښکلي سوات انځور دی
ژوند په مري کې چکر دی
ژوند د ګلو ګلدسته ده
ژوند ښایسته باغ بابر دی
ژوند د سور او خوند کیسه ده
ژوند د ښکلي رباب ترنګ دی
ژوند پر کیفه موسیقي ده
ژوند د ښه غزل اهنګ دی
ژوند کالونه پس وطن ته
راستون شوی مسافر دی
ژوند د ژمي په ماښام کې
له وړیو جوړ څادر دی
ژوند رنګینه لوپټه ده
ژوند د ناوي جوړ اوربل دی
ژوند د خوند ډکه سندره
ژوند د ښې موضوع غزل دی
ژوند د رنګ او خوند چینه ده
ژوند ټپه ده یاقربان دی
ژوند د پاک زړګي تسل دی
ژوند په ښکلي غږ اذان دی
ژوند ښایسته ملي بیرغ دی
ژوند سندره د وطن ده
ژوند په سره اوړي سایه ده
ژوند رڼا د ماسخوتن ده
ژوند د سپینې خولګۍ خرپ دی
د همزولو مینانو
ژوند د ښو شرابو جام دی
په نظر د میخوارانو
ژوند چکر دی په قرغه کې
د پغمان د درې سېل دی
ژوند د یار په سپینه غاړه
د مرمرو ډک امېل دی
ژوند ښایسته دی ژوند رنګین دی
ژوند د مینې ډک جهان دی
څه به وایم لنډه دا چې
ژوند جانان دی،ژوندجانان دی،ژوند جانان دی
قدرت الله درمان خوست
