د مزدور د لاس تڼاکې هم گوهر دي
بټ لرونکي ته کڼاکې(۱)هم گوهر دي
لېونى او لېونى سره پوهېږي
که کېسې کوي کاواکې هم گوهر دي
چې مسکى شي د يار شونډې غوټۍ گل شي
چې خاموش وي مُهرلاکې هم گوهر دي
د سپين مخ په ميکده کې ښکلې سترگې
هم قاصدې هم خوستياکې(۲)هم گوهر دي
نه پوهېږم د ساده دغه سندرې!
هم ساده دي هم تُلپاکې(۳)هم گوهر دي.
٢٦ /٠٣ /١٣٨٦
حيدرآباد
(١) کڼاکې : دجوارو هغه دانې چې په بټ کې گل يانينې نه شي.
(٢) خوستياکه،خوسياکه،خېسياکه : د خوست په بېلابېلو لهجو کې ابابيل _ توتکۍ ته وايي.
(٣) تلپاک، جمع تلپکان، مونث تلپاکې _ ت، په پېش سره : زموږ په لهجه کې معصوم _ پاک _ او سوتره ماشوم ته وايي.
