ځان به څنگه سره گلاب ته رسومه؟
دا پوښتنه به ځواب ته رسومه
زړه مې سپين شو د دنيا له ډېره غمه
دغه ستورى به مهتاب ته رسومه
د ضمير په پاچاهۍ کې مې فکرونه
په سندرو انقلاب ته رسومه
په ډيوه کې به د زړه وينې هم توى کړم
شپه د هجر به افتاب ته رسومه
وچې وچې د ساده د نظر شونډې
ستا د ښکلې مخ کتاب ته رسومه.
٢٨/٠٤/١٣٨٥
حيدرآباد
مينه کوي مگر دلبر نه لري
په دغه کار کې پيغمبر نه لري
ايله چې زړه ورباندې خوږ شي د چا
دومره په سترگو کې اثر نه لري
په هره شپه پسې سحر وي ضرور
زموږه شپه ولې سحر نه لري
دا برکت د پرمختگ دى زموږ!
ژڼي جومات پېغلې گودر نه لري
شيطان بې غمه پکې گرځي آزاد
د چا د زړه کلا چې ور نه لري
مزل په سمه ورته گران شي بيخي
د عشق په لار کې چې رهبر نه لري
سړي به کړى ﻻ پخوا وى الوت
له دغې چمه خو وزر نه لري
لومړى به جام د محبت وي د دوى
هلته چې څوک پر اوږو سر نه لري
ژړا رادرومي د پاچا پر احوال (۱)
داسې پاچا دى چې عسکر نه لري
اغيار ملگرى د رقيب دى ساده
د آيېنې شا ته جوهر نه لري.
٢٩/٠٤/١٣٨٥
حيدرآباد
(۱) :په دې وختونو کې د کرزي ساتونکي عسکر هم بهرنيان و.
