امريکا وايي، چې په منځني ختیځ او افريقا کې به، له يمن پرته، په نورو ټولو هېوادنو کې خپل تړل شوي سفارتونه بيرته پرانيزي.
څو ورځې مخکې د امنيتي ګواښونو له امله، امريکا د يو شمېر خپلو سفارتونو د تړلو پرېکړه کړې وه. د دغه سفارتونو د تړلو لپاره په رسنيو کې راز راز لاملونه ښودل شوي وو، چې په ټوليزه توګه يې له امنيت سره تړاو درلود.
د ((نيويارک ټايمز)) ورځپاڼې په يوه رېپوټ کې په ليکل شوي و، چې د القاعده د مشر ايمن الظواهری او په يمن کې د القاعده د ډلې مشر ناصر الحبيشي تر منځ تيلفوني خبرو د دې لامل و، چې په منځني ختيځ او افريقا کې د امريکا ۱۹ سفارتونه وتړل شي.
د رېپوټ له مخې، الظواهري الجيشي ته سپارښتنه کړې وه، چې په سيمه کې د امريکا د ګټو پر ضد دې بريد تر سره کړي.
په يو بل خبر کې، د امريکا لوړپوړي چارواکي ويلي، چې د القاعده د هغه چاوديدنکو نويو توکو نه په اندېښنه کې دي، چې مايع يا اوبلن شکل لري او دوی يې تر اوسه نه پيژني.
د (( اېنډيپنډينټ)) ورځپاڼې، د دوو لوړ پوړيو امريکايي چارواکو له قوله خبر ورکړی، چې دغه مايع چاوديدونکي توکي داسې خاصيت لري، چې د بېلګې په توګه کالي په کې لانده کړې او تر وچيدو وروسته چاودنه رامنځته کوي.
داسې اټکل کيږي، چې دغه نوي چاوديدونکي توکي به د يمن دالقاعده لخوا او د ابراهيم الاسيری نامتو بم جوړونکي په لاس جوړ شوي وي، چې د سعودي عربستان تبعه دی.
