افغان دولت له طالبانو سره پټې خبرې کړې دي

After the Taliban opened its political office (pictured) in Qatar in June, Afghan President Hamid Karzai accused the religious militia of trying to establish a government in exile.
 
اسوشيټېډ پرېس د يو شمېر افغان چارواکو له خولې خبر ورکوي، چې د افغان  دولت يو شمېر استازو له  طالبانو سره پټې خبرې کړي او هڅه يې کړې چې په دوحه کې د طالبانو د دفتر پرانيستو ته لاره  پرانيزي. حبيب الله فوځي چې د طالبانو له  مشرانو څخه و او اوس د کرزي د سولې د عالي شورا غړی دی، ويلي چې د شورا يو شمېر غړو په انفرادي توګه له طالبانو سره کتلي دي. ده همداراز ويلي چې د حج د عمرې پر مهال په سعودي عربستان  کې د سولې شورا د غړو او  طالبانو  تر منځ  ورته خبرې شوې دي. د بهرنيو چارو وزارت وياند جانان  موسی زي هم  منلې ده، چې يو شمېر چارواکي له طالبانوسره په اړيکه  کې دي. د ورځپاڼې په وينا تېره اونۍ د امريکې د بهرنيو چارو وزير جان کېري هم پاکستان ته د خپل سفر پر مهال پر پاکستان فشار راوړ  چې طالبان د سولې خبرو ته وهڅوي.
د طالبانو، امريکې او افغان حکومت تر منځ د سولې رسمي خبرې تر هغه وروسته شنډې شوې، چې طالبان په دوحه کې د خپل دفتر له پاسه د بيرغ او لوحې په  کښته کولو اړ شول.