واشنګټن پوسټ د امريکې د استخباراتي سرچينو په حواله
خبر ورکوي، چې تر يوې لسيزې پراخو عملياتو وروسته
اوس سي آی اې په افغانستان کې دخپلو لسګونو پټومرکزونو پر تړلو پيل کړی دی. ورځپاڼه ليکي، د مرکزونو تړل په افغانستان
کې د القاعدې د ګواښ کمېدلو، منځني ختيځ ته دزياتې پاملرنې
اړتيا او د جاسوسۍ له دوديزو تګلارو سره د سي آی اې د نوي مشر د لېوالتيا څرګندونه کوي. د خبر له مخې سي آي اې به په کابل کې خپل مرکز چې
د نړۍ په کچه تر ټولو لوی مرکز دی، پرانيستی وساتي او تر څنګ به يې په جلال اباد
کې د ډرون الوتکو هوايي اډه هم خپلو
فعاليتونو ته دوام ورکړي. د پلان له مخې
به د پاکستان د پولې په اوږدو کې لسګونه پټ مرکزونه وتړل شي، چې په خوست کې د (چاپمن)
اډه به هم په همدې لړ کې وي. د تړل شويو
اډو زياتره کارکوونکي به د کابل مرکز ته
او همداراز د بګرام، کندهار، جلال آباد، هرات او مزارشريف اډو ته انتقال شي.
د سي آی اې يو متقاعد مامور (ريچارډ بلي) واشنګټن پوسټ ته ويلي، چې په
افغانستان کې سي آی اې د استخباراتي
فعاليتونو پر ځای زيات پوځي او جګړه ييزو عملياتو ته مخه کړه، ځکه چې دلته دوديز استخباراتي فعاليتونه ډېر اغېزناک نه وو،
خو د سي آی اې نوی مشر غواړي بېرته دوديزو فعالیتونو ته مخه کړي.
