په هلمند ولایت کې د یو باب ښوونځي بیا پرانېستل

د ۱۳۹۱ کال د وري ۱۵ مه

دا دی د خدای تعالی په مرسته او همکارۍ پوهنې وزارت په دې وتوانېد هغه څه ته چې د ښوونځیو په بیا پرانېسته کې د افغانستان مظلوم ملت او علم پروره ولس ته ژمن دی یو پر بل پسې خپل هدف ته رسېږي.
نن د پوهنې وزارت په ډېر افتخار سره اعلان وي، چې د علمای کرامو، مخورو شخصیتونو، د ملت درانه نماینده ګانو، قومي مشرانو په پراخ ګډون او له پوهنې څخه د حمایت شورا ګانو په هڅه او هاند او نورو ګڼو ذیدخله شخصیتونو چې د ناوې ولسوالۍ د سرخ دوز متوسطې په قضیه کې چې د مختلفو عواملو په اساس په ۱۳۸۴ کال کې تړل شوې وه، بېرته پرانېستل شوه.
د دې  مکتب په بیا پرانېستلو سره له ۴۰۰ څخه ډېرو زده کوونکو ته د بیا زده کړې زمینه برابره شوې ده.
د پوهنې وزرات دغه لویه لاسته راوړنه ټولو درنو هېوادوالو په ځانګړې توګه د ناوې ولسوالۍ معصومو ماشومانو ته چې د ښوونځیو د تړل کېدو په وجه د علم له نعمت څخه بې برخې وه، مبارکي وایي.
د پوهنې وزارت رهبري په ټول هېواد کې له ګرانو هېوادوالو، علمای کرامو او درنو ملا امامانو څخه چې د یادو ښوونځی په بیا پرانېسته  کې مرسته کړې، د قدر په سترګه ورته ګوري.
د پوهنې وزارت په ټول هېواد کې له درنو وطنوالو څخه غواړي تر څو د ښوونځیو په جوړولو، د تعلیمی او روزنیزو موسسو او د معصومو ماشومانو او شاګردانو، ښوونځیو او مدرسو په ساتلو کې د زړه له کومې هڅه او هاند وکړي او د خپلو خلکو او هېواد په وړاندې خپله دیني او ملي  وجیبه تر سره کړي.

په درنښت