خوست هغه ګڼ نفوسه او بنسټیزو پروژو ته مختاج ولایت دی ، چې له پلازمېنې کابل څخه په ډېره لېرې فاصله کې موقعیت لري.
خوست چې زیات خواريکښ او همتي خلک لري، همېش یې له دې خواږه ټاټوبي څخه نورو هېوادونو ته د کالونو، کالونو مودې تېرولو په نیت سفرونه کړي او هلته یې د خپلو لاسونو په تڼاکه کولو سره حلاله روزي ګټلي ده .چې په دې سره یې له یوې خوا خپلې کورنۍ له حلالې نفقې برخمنې کړي او له بل پلوه یې دهمدې سختیو تېرولو له امله خوست د پرمختګ خواته ټېل وهلی دی .
دا مهال د دې ولایت په ښار کې زیاتره لوړپوړیزې ودانۍ ، ښایسته کورونه ، کوچني او غټ وسایط د همدې مسافرو د خواریو او همتونو له برکته جوړ شوي او تر ټولو مهمه یې داده،چې په بهرنیو عربي مملکتونو کې دخوست هرمسافر لکه د یوه مسلکي او اصیل سفیر په توګه د عزتمندغوره ژوند استازیتوب کړی دی ، چې د همدې له امله په یادو هېوادونو کې د درناوي ښه مقام لري .
اوس وخت خوست هغه ولایت دی ، چې په عربي ممالکو کې له سلوزرو زیات مسافرین لري ، خو یوه لویه ستونزه چې د دوی په مخ کې پراته ده، هغه د یوه لوی نړیوال هوایي ډګر نشتوالی دی .چې د همدې له خاطر په تګ راتګ کې له ګڼو ستونزو سره لاس او ګرېوان وي .همدا وجه وه،چې دخوست ولسونو به همېش د ولسمشرښاغلي حامدکرزي، نړیوالې ټولنې او د خوست له والیانو سره په لیدنو کې د نورو بنسټيزو پروژو په لومړیتوب کې دلته د هوایي ډګر دجوړېدلو غوښتنه مطرح کوله .
رښتیا هم په دې ولایت کې د نړیوال هوایي ډګر جوړېدل خورا زیات اړین دي.ځکه چې د هوایي ډګر په جوړېدلو پورې زیات پرمختګونه تړلي دي .لکه په سوداګریزو چارو کې پراختیا او اسانتیاوې، حج مبارک د تلو راتلو، په بهرنیو هېوادونو کې د مېشتو مسافرینوپه تګ راتګ ، ډاډمن امنیت په ټينګښت ، دبې روزګاریود کچې په ټيټوالي، روغتیایي ستونزو په هواري ، د ملي اقتصاد په پیاوړتیا او نورو ټولنیزو برخو کې مهم مثبت رول لوبولی شي .داسې یو اغېزمن رول چې هغه سیمه ورسره په ټولو برخو کې د پرمختګ بنسټیز پرمختګونه کوي او وګړي یې د غوره ژوندانه څښتنان ګرځي .
په دې اساس دخوست د ټولو پرګنو په زړونو او خولو کې دلته د هوایي ډګر د پروژې عملي کول ستر ملي ارمان یادېده .چې ددوی په خبره هغه ورځ به ورته دخوب لیدل وي، په کومه ورځ یې چې د هوایي ډګر د جوړولو لپاره د بنسټ ډبره کېښودل کیږي .همداسې وشول ،د بې درېغه هلو ځلو او مبارزې کولو وروسته په دې ولایت کې د هوایي ډګر پروژه منظوره شوه او بالاخره د خوست د خلکو هغه ستر آرمان هم پوره شو، چې د رسمي عملي کار په اړه یې درلود.
د هوایي ډګر د چارو په پیلېده سره په خوست ولایت کې د ننه او همداشان په عربي ممالکو کې د زرګونو خوستمېشتو مسافرینو له خوا دخوښۍ جشنونه جوړ شول او دغه کار یې هغه لوی آرمان یاد کړ، چې د لسګونو کالونو راهیسې یې درلود، خومګر عملي بڼه یې نه وه غوره کړي .دوی په دې جشنونو کې دخوست د ولایتي ادارې څخه غوښتنه کوله ،چې هېچا ته ددې موقع ورنه کړي، چې د هوایي ډګر د جوړېدو په وړاندې ستونزې او خنډونه ایجاد کړي .ځکه چې د دې بنسټيزې او حیاتي پروژې سره مخالفت ، ستر ملي خیانت دی او هر څوک چې دغه ملي خیانت کوي، باید په سخته سزا ورسیږي .همدارنګه یې له مرکزي حکومت او نړیوالې مرستندویه ټولنې څخه غوښتنه درلوده،چې دملکي نړیوال هوایي ډګر په جوړېدو کې هغومره هراړخیزې مرستې او کومکونه وکړي، څو چې په بشپړ ډول ګټې اخېستنې ته وسپارل شي .
خو له بده مرغه د څو کسانو له لوري وخت نه وخت د ستونزو ایجادولو هڅې وشي،دوی هغه کسان دي، چې د شخصي ګټو په خاطر د ځمکې له مافیا سره نېغ په نېغه اړیکې لري او همېش د خپلو جیبونو د ډکولو په موخه له بې وزله او غریبو کورنیو څخه په یوه او بل نوم پیسې راټولوي او بیا په دې نوم مرکز کابل ته ځي، چې د فلانۍ ناحقې دعوې په اړه ورته امر راوړي .چې دغه ډول کړنې له شک پرته د اسلام د مبین دین، اساسي قانون، د ټولو ملي او بین المللي اصولو خلاف او ناوړه عمل دی .نو په کار ده، چې نور دا ډول خلک په خپلو کړنو باندې له سره غور وکړي اوپرې نږدي، چې نور په دواړه جهانونه کې له ستونزو سره لاس او ګرېوان شي .
زه د خوست د یوه اوسېدونکي په صفت د ټولو دیني علمااکرامو،قومي مخورو مشرانو، مدني ټولنو، ژورنالستانو او لیکوالانو غوښتنه کوم، چې د ټولو هغو کسانو په وړاندې په یوه غږ کلک ودریږي، څوک چې دخوست له پرمختګ او اسانتیاوو سره دښمني لري .
آخر تر څو پورې به موږ دخوست خلک له بنسټيزو پروژو او سهولتونو څخه محروم پاتې وو او اخر تر څو به موږ د یو څو تنو خودغرضواشخاصو له وجې په لوی لاس مرکزي حکومت او نړیوالې ټولنې ته خجالت وو.ځکه چې تاسو ټول د دې شاهدان یاستۍ، چې مرکزي حکومت او نړیوالو مرستندویانوموږ ته په وار، وار مالي مرستې راکړي او بېرته د شخصي ناچیزه ګټو په اساس مستردې شوي دي .
مبارزمحمدځدراڼ /خوست /افغانستان
یکشنبه -۱۳۹۰/۷/۲۴
