کابل ارګ :
ولسمشر حامد کرزی د یو لوړ پوړي دولتي پلاوي په مشرۍ
نن غرمه د یو درې ورځني رسمي سفر لپاره انګلستان ته روان شو. حامدکرزی به د انګلستان ته د خپل درې ورځني سفر په ترڅ کې
د دغه هېواد له لومړي وزیر دیوید کامرون، مرستیال لومړي وزیر نک کلیګ، د بریتانیا له ولیعهد
شهزاده چارلز او د بریتانیا د پارلمان د بهرنیو اړیکو دکمیټې له غړو سره وګوري او
د دواړو هېوادونو ترمنځ د اړیکو د پراختیا او له افغانستان سره له ۲۰۱۴ میلادي کال وروسته د بریتانیا د مرستو او
همکاریو د دوام په اړه به خبرې اترې وکړي.همدا راز حامدکرزی به د سې شنبې په ورځ د
بریتانیا د دفاع وزیر لایم فاکس، په بهرنیو چاروکې د بریتانیا د دولت وزیر الیستیر
بورت، د بریتانیا لوی درستیز دیوید ریچارد او د بریتانیا د نړیوالو مرستو دادارې رئیس
مارک لوکاک په ګډون په یوه ناسته کې برخه واخلي چې د افغانستان او سیمې د حالاتو،
له نړیوالو ځواکونو څخه افغان ځواکونو ته د مسوولیت د لیږدونې د بهیر، د انکشافي
پروژو د پراختیا، له مخالفینو سره د روغې جوړې د بهیر او له افغانستان سره د بریتانیا
د اوږد مهالو مرستو د دوام په اړه بحث او خبرې اترې پکې وشي.حامد کرزی به د خپل
سفر په ترڅ کې په بهرنیو چاروکې د بریتانیا د دولت د وزیر ښاغلي الیستیر بورت په
کوربه توب د سوداګرو په یوه غونډه کې ګډون وکړي چې له افغانستان سره د اقتصادي
همکاریو د پراختیا په باب به پکې خبرې اترې وشي.
همداراز حامدکرزي به د بریتانیا له موزیم څخه د لیدنې پرمهال په دغه موزیم
کې دافغانستان دباختر دګنجنې د اثارو نندارتون هم پرانیزي .
