رفيع الله زيار
هم يې جامه هم يې پګړۍ سپينه ده
هم د پښتون د زړه نړۍ سپينه ده
فيصلې شي په کې د شپو لپاره
منم چې ستا دنګه ماڼۍ سپينه ده
پاچا که شنه شړۍ په تن کې لري
بل يې د ښکلي خيال شړۍ سپينه ده
د تورو زلفو کړۍ تور رنګ لري
نن مې لاسونو کې کړۍ سپينه ده
پاتې کېدلو کې يې ځنډ نه راځي
ځي د قلم دغه لړۍ سپينه ده
مين د مينې جام په تا پسې وړي
رڼو اوبو نه د غړۍ سپينه ده
زياره تل هغه سړی کامياب دی
چې يې د ژوند هره ګړۍ سپينه ده
۲۵\۱۱\۱۳۸۹
خوست
