په نړۍ کې ډېر زیات بریالي کسان شتون لري، چې فوق العاده ښې کړنې لري او البته نور افراد هم شتون لري، چې هغوی رهبري کوي، برایان ټریسي د دې افرادو له ډلې څخه دی. هغه د کارو بارونو د اداره کولو لپاره یو ستر رهبر او د ژوند لپاره یو ښه لارښود دی. برایان ټریسي له زرو څخه ډېرو بېلابېلو شرکتونو سره مرسته کړې، ترڅو حیرانونکو پایلو ته ورسېږي.
لاندې لیکنه په ښه غور سره ولولئ، ترڅو د برایان ټریسي په غوره سپارښتنو او د بریا په اصولو باندې پوه شئ او په آسانۍ سره وکولای شئ د بریا تګلوری پیدا کړئ.
۱ ـــ له همدې ځایه یې پیل کړئ
برایان ټریسي په دې باور دی: «د بریالیو او ناکامو کسانو ترمنځ توپیر دا دی، بریالي کسان لاس په کار کېږي، هغو خپل کار پیلوي او هر کار چې غواړي ترسره کوي یې. ناکام کسان همدا آیډیاوې لري، خو د اقدام نه کولو لپاره تل بهانې لري.»
دا په بشپړه توګه تر ټولو غوره نقل قول دی، چې د برایان ټریسي له خولې څخه مو اورېدلی دی. ډېری کسان په دې بهانې سره، چې بالاخره یوه ورځ یې پیلوي، تل خپل کارونه ځنډوي؛ خو حقیقت دا دی، چې «یوه ورځ» هېڅکله نه را رسېږي او هغه دروغ دي، چې د خپل وجدان د آرامه کولو لپاره یې، خپل ځان ته وایو، لومړی خپل لومړیتوبونه وپېژنئ، باید په دقیقه توګه په دې باندې پوه شئ، چې په دې میاشت یا په دې کال کې غواړئ څه څیز ته ورسېږئ او خپلې موخې ته د رسېدو لپاره، خپلې ټولې هڅې وکړئ.
لږ فکر وکړئ، که د ورځې دوه ساعتونه د یوه مهارت د زده کولو لپاره ځانګړي کړئ، نو د دوو میاشتو په لړ کې به په منځنۍ کچه په میاشت کې ۱۰۰۰ تر ۲۰۰۰ ډالرو پورې ډېره ګټه ترلاسه کړئ، د دې ګټې ډېرښت ستاسو په ژوند کې کوم بدلون رامنځته کوي؟ د ژوند بڼه به مو په څه ډول شي؟
۲ ـــ د متخصصو افرادو له لارښوونو څخه ګټه واخلئ
برایان ټریسي وایي: «دا سپارښتنه مې د کاپ کاپمیر (Kop Kopmeyer) په نامه له یوه په کارپوه او مدبر فرد څخه واورېده، چې له پنځوسو کالونو څخه زیات د بریا په اړه د لیکنو او مقالو په لوستلو بوخت دی. هغه بریا ته د رسېدو لپاره ۱۰۰۰ اصول لري، کله مې چې هغه ولیده، نو پوښتنه مې ترې وکړه، چې په دې زرو اصولو کې کوم یو یې له نورو څخه غوره دی؟ هغه وویل: د بریا له ثابتو شویو تګلارو څخه ګټه واخله.»
د بریا تر ټولو غوره اصل دا دی، چې اړتیا نه شته، څرخ له پیله اختراع کړئ، بلکې تګلوری له وړاندې ستاسو په مخکې چمتو دی، یوازې هغه کار چې باید ترسره یې کړئ، دا دی، چې هره ورځ، څو کوچني ګامونه د خپلو موخو په لور پورته کړئ.
برایان ټریسي وایي: غږیزو فایلونو، کتابونو او وېبلاګونو ته په مراجعې سره، کولای شو د سترو انسانانو د بریا رازونو ته لاسرسی پیدا کړو، یوازینی څیز دا دی، چې اقدام وکړئ.
که یوازې د هغو څیزونو په اړه چې غواړئ یې فکر وکړئ، په کوم څه کې بدلون نه رامنځته کېږي، د هرې ورځې خیالبافۍ ته د پای ټکی کېږډئ او پرځای یې په خپلو خوبونو کې ژوند وکړئ. دا د برایان ټریسي تر ټولو غوره نقل قول دی، چې له تاسو سره مرسته کوي، چې په ژوند کې د پام وړ بریاوو ته ورسېږئ.
۳ ـــ یوازې په یوه څیز باندې تمرکز وکړئ
برایان ټریسي وایي: «لس موخې، چې غواړئ په نوي کال کې ورته لاسرسی پیدا کړئ، د کاغذ پرمخ یې ولیکئ. دا پوښتنه وکړئ، که یوازې وکولای شم، د لېست له موخو څخه یوې ته یې ورسېږم، نو کومه یوه به یې زما په ژوند باندې مثبته اغېزه ولري؟ هغه موارد د کاغذ پرمخ ولیکئ او د خپل ژوند اصلي موخه یې وګڼئ.»
یوه له سترو تېروتنو څخه، چې ډېری کسان یې کوي، دا ده، چې هڅه کوي، خپل ژوند ته په یو مخیز ډول بدلون ورکړي. هغوی غواړي خوندوره اړیکه پیل کړي، میلیونر شي او ښکلی ښکاره شي، د فکر دا بڼه د دې سبب ګرځي، چې تمرکز یې را کم شي، نو خپله انرژي د لایزر په څېر متمرکزه کړئ او ټول هغه خنډونه، چې په لاره کې مو شتون لري، له منځه یوسئ.
۴ ـــ له خپل وخت څخه ښه ګټه واخلئ
برایان ټریسي وایي: «زه تل داسې فکر کوم، چې ژوند مې لمر دی او د ژوند ټول لاملونه مې د ستورو په څېر دي، چې د ژوند شاوخوا مې را څرخي. دا لاملونه کېدای شي، جسمي روغتیا، ټولنیزې اړیکې یا دنده وي. ژوند مې هغه مهال بدلون کوي، چې وینم د وخت مدیریت، لمر دی او نور ټول څیزونه ستوري دي، چې څرخي.»
ارزښتمن ټکی دا دی، تر ټولو غوره سرچینه چې په واک کې یې لرئ، وخت دی، که له وخت څخه په سمه توګه ګټه واخلئ، نو کولای شئ په ډېرې چټکۍ سره، خپلو موخو ته ورسېږئ. د وخت په سم مدیریت سره، ډېر کسان، په ځانګړې توګه ټیموټي سکای یا مارک زاکربرګ میلیونر او میلیادر شول.
کله چې خپل ځواک متمرکز کوئ، ډېر ژر تېروتنه کوئ، په چټکه توګه زده کوئ او دا تجربه د دې سبب ګرځي، له نورو څخه ژر بریا ته ورسېږئ. تل له وخت سره د پیسو په څېر چلند وکړئ، ترڅو ډېر ژر پرمختګ وکړئ.
۵ ـــ خپلې موخې د پوښتنو په څیر جوړې کړئ
برایان ټریسي وایي: «داسې یوه تګلاره شتون لري، چې د بلې هرې تګلارې په پرتله افراد ډېر ژرشتمنۍ ته رسوي. دا تګلاره د پوښتنې په څېر د سترو موخو جوړول دي، نو باید ځان اړ کړئ، چې دې پوښتنې ته شل ځوابونه پیدا کړئ.»
که اصلي موخه مو دا وي، چې سبز کال ۱۰۰ زره ډالره وګټئ، نو پوښتنه یې داسې جوړه کړئ: «څنګه کولای شم، چې سبز کال ۱۰۰ زره ډالره ګټه ولرم؟ اوس دې پوښتنې ته ۲۰ ځوابونه پیدا کړئ. تر ټولو غوره تګلاره داده، چې په اړه یې یو کتاب ولولئ.
۶ ـــ د یوه بریالي فرد په څېر چلند وکړئ
برایان ټریسي وایي: «که غواړئ ډېره زیات شتمني ترلاسه کړئ او د یوه میلیونر په څېر ژوند وکړئ، یو له غوره کارونو څخه چې کولای شئ ترسره یې کړئ، دا دی: د خپل فکر په بڼه او کړنو کې داسې عاداتونه رامنځته کړئ، چې د دې سبب شي، نور له هغو څخه په ګټه اخیستنې شتمن شي.»
که غواړئ سترو لاسته راوړنو ته ورسېږئ، هرومرو باید ستر فکر وکړئ. ښایي ونه غواړئ یو د خپلو مهارتونو لپاره ۵۰ ډالره لګښت ورکړئ، نو څنګه کولای شئ، چې په سلګونو زره یا یو میلیون ډالره ګټه ولرئ؟
۷ ـــ هېڅکله مه تسلیمېږئ
برایان ټریسي وایي: «کله چې هر ځل نوي څیزونه وازمایئ، نو په احتمالي توګه هېڅ بریا ته به ونه رسېږئ. ژوند کې مې هغه بدلون رامنځته شو، چې ومې موندله، هېڅ څیز، چې یو ځل یې ترسره کوم، نه بریالی کېږي، نو تصمیم مې ونیوه، چې یوه آیډیا لږ تر لږه ۵ تر ۱۰ ځلو پورې وازمایم. عمل کول هېڅکله د بایلونکي اوسېدو سبب نه کېږي. یوازې هغه مهال بایلونکی کېږئ، چې هېڅ کار ترسره نه کړئ.»
په پایښت، هڅې او کوښښ سره بریا ته رسېږئ، کله چې لوړه اراده ولرئ، بریا به مو حتمي وي. ډېری کسان د یوې پروژې له پیل څخه ۳ یا ۴ میاشتې وروسته تسلیمېږي، که په کافي اندازه پایښت ولرئ، نو کولای شئ پرمختګ وکړئ. دا له برایان ټریسي څخه غوره نقل قول دی.
۸ ـــ د نورو لپاره ښه بېلګه واوسئ
برایان ټریسي وایي: «ډېری وخت ښه او غوره څیزونه زده کوو او اورو یې، موخه دا ده، چې په اړه یې نور باوري کړو. تاسو باید د نورو لپاره ښه بېلګه واوسئ او له دې لارې هغوی ته زده کړې ورکړئ؛ ځکه هغوی په بلې تګلارې سره زده کړې نه کوي.»
کله چې فکر کوئ، چې درېدلي یاست، نو خپل ځان ته ووایئ: «دا یو ښه فرصت دی، چې په یوه نوي فرد باندې بدل شم.» څو میاشتې د بدلون لپاره تصمیم ونیسئ، ترڅو ووینئ، چې ډېر زیات کسان به تاسو ته راشي او له تاسو څخه به پوښتنه کوي: «ستاسو د بریا راز په څه کې دی؟ څنګه مو وکولای شول، چې دومره ژر بدلون وکړئ؟» په دې ترتیب پر ځای د دې چې تاسو هغوی باوري کړئ، هغوی ته مو یو نوی څیز ور زده کړی دی.
برایان ټریسي وایي: تاسو یوازې هغه مهال کولای شئ، نورو ته نوی څیز ورزده کړئ، چې هغه مو په یوه روښانه مثال سره ښودلی وي.
۹ ـــ په خپل ځان کې ښه عادتونه رامنځته کړئ
عادتونه مو راتلونکې جوړوي. که غواړئ یوه ستره او کلکه ودانۍ جوړه کړئ، نو ځواکمنو ستنو ته اړتیا لرئ. کله چې په خپل ځان کې مو ښه عادتونه نه وي رامنځته کړي، نو خوبونه به مو په واقعیت باندې بدل نه شي.
دا ستر کار رامنځته کوونکی، موږ ته یو ارزښتمن درس راکوي. د نامناسبو عادتونو د پرېښودلو لپاره، باید د خپلو ښو عادتونو په رامنځته کولو باندې تمرکز وکړئ. خپله ټوله هڅه وکړئ، ترڅو په خپل ځان کې ښه عادتونه رامنځته کړئ، په دې ترتیب بد عادتونه ډېر ژر له منځه ځي. دا بریا ته د رسېدو لپاره د برایان ټریسي له غوره سپارښتنو څخه ده.
۱۰ ـــ هېڅکله خپل خوبونه مه هېروئ
برایان ټریسي وایي: «هر فرد باید په کوم عمر کې خپل خوبونه خوشې کړي؟ هېڅکله. هنري فورډ او راکفلر هم وایي: تاسو یوازې د خپلو خوبونو په اندازه زوړ یا ځوان یاست. تر کله چې خپل خوبونه، لید لوري او موخې څارئ، ژوندي یاست.»
ډېر زیات کسان شتون لري، چې له څلوېښت یا پنځوس کلنۍ وروسته بریا ته رسېدلي دي. هغه درس، چې کولای شو له دې افرادو څخه یې زده کړو، دا دی، چې هېڅکله د خوبونو د څارلو لپاره ناوخته نه ده. له ارنسټین شفرډ (Ernestine Shepherd) څخه عبرت واخلئ، چې تر ټولو بوډا فرد دی او د غړو د ښکلا په برخه کې فعالیت لري؛ نوموړی ۸۰ کلن دی او نوم یې د ګېنس په نامه د نړۍ د ریکارډونو په کتاب کې ثبت شوی دی.
له بریالیو کسانو څخه په عبرت اخیستلو او همدا نن په اقدام کولو سره، کولای شو هر هغه څه ته ورسېږو، چې غواړو یې، نو خپل وخت بېځایه مه تېروئ، له هرې ستونزې سره، چې مخامخ کېږئ، د حل تر ټولو غوره لاره داده، چې زده کړئ، فعالیت ولرئ او تمرین وکړئ.
د برایان ټریسي ارزښتمنې سپارښتنې:
ـــ بریالي کسان تل له نورو سره د مرستې لپاره د یوې لارې د موندلو په لټه کې دي. ناکام کسان تل پوښتنه کوي: دا کار زما لپاره څه ګټه لري؟
ـــ ټول بریالي کسان ستر خوبونه لري. هغوی د خپلې خوښې وړ راتلونکې مجسمه کړې ده او هره ورځ خپلې د پام وړ موخې ته د رسېدو په لاره کې ګړندي ګامونه پورته کوي.
ـــ باید دومره جزئي هڅه وکړئ، ترڅو یوه ارزښتمن څیز ته تر رسېدو مخکې، هېڅوک ونه شي کولای وې ویني او وې ستایي.
ـــ که خپل اولادونه مو په داسې بڼه ستر کړي وي، چې خپل ځان د هرې موخې او هر کار په وړاندې، چې د ترسره کولو په لټه کې یې دي، پیاوړي ګڼي، نو په دې صورت کې بریالي والدین یاست او خپلو اولادونو ته مو تر ټولو ارزښتمن څیز ورکړی دی.
ـــ بریالي کسان هغه دي، چې په خپل ځان کې یې د بریا عادتونه رامنځته کړي دي.
ـــ ټول هغه څیزونه، چې په هر ډول شرایطو کې، له نړۍ سره د مقابلې لپاره ورته اړتیا لرئ، ستاسو په دنننه کې پیدا کېږي.
ـــ تر ټولو غوره ډالۍ، چې کولای شئ نورو ته یې ورکړئ، منل او بې قید و شرطه مینه ده.
ـــ تصور وکړئ، چې هېڅ محدودیت شتون نه لري، مخکې تر دې چې شرایط په پام کې ونیسئ، وګورئ چې څه څیز سم او د خوښې وړ دی.
ـــ په هر څه باندې چې باور ولرئ، نو ستاسو لپاره به واقعیت باندې بدل شي.
ـــ هر کار، چې ترسره کوئ، لېوالتیا او وېرې مو، تاسو یې ترسره کولو ته هڅولي یاست.
ـــ مینه په څرګندولو سره وده کوي، یوازې هغه مهال کولای شئ، چې ډېره زیاته مینه ترلاسه کړئ، چې نورو ته یې ډېره ډالۍ کړئ.
ـــ مهمه نه ده، چې څه ډول تېر مو درلوده، یوازې هغه څه چې مهم دی، دا دی، چې غواړئ په راتلونکې کې چېرته لاړ شئ.
ـــ ستاسو تر ټولو غوره شتمني، د ګټې په ترلاسه کولو کې مو مهارت دی. تر ټولو ارزښتمنه سرچینه هم وخت دی.
ـــ له خپلې خوندي سیمې څخه را بهر شئ، یوازې هغه وخت پرمختګ کولای شئ، چې وکولای شئ، په هغه ناخوښه احساس باندې، چې د یوه نوي کار د پیل پرمهال درته پیدا کېږي، غلبه وکړئ.
ـــ د اړیکې ټینګښت هغه مهارت دی، چې کولای شئ زده یې کړئ، که د دې مهارت د ترلاسه کولو لپاره هڅه وکړئ، نو ډېر ژر کولای شئ، چې د خپل ژوند کیفیت ښه کړئ.
ـــ د خپلې ګټې، درې سلنه په خپلې فردي پراختیا باندې ولګوئ، ترڅو راتلونکې مو تضمین شي.
ـــ که غواړئ په خپل شخصي او مسلکي ژوند کې، ارزښتمنو څیزونو ته لاسرسی پیدا کړئ، نو باید په کافي اندازه د خپلې فردي پراختیا لپاره هڅې وکړئ.
ـــ هر څومره، چې ډېر د خوندیتوب په لټه کې شئ، نو ډېر کم یې ترلاسه کوئ، خو هر څومره، چې ډېر د بېلابېلو فرصتونو په لټه کې واوسئ، نو په ډېر احتمال سره به د پام وړ خوندیتوب ته به ورسېږئ.
ـــ هرڅومره، چې نورو ته ډېر اعتبار ورکړئ، نو ډېر اعتبار به ترلاسه کړئ. هر څومره چې له نورو سره زیاته مرسته وکړئ، نو هغوی به هم له تاسو سره د مرستې کولو لپاره ډېره لېوالتیا ولري.
ـــ د هر څه په اړه، چې په آګاهانه توګه فکر وکړئ، په تجربه کې مو دوامداره پاتې کېږي.
