پدې اړه مو مشوره او نظریات مهم دي
پر پښتو ژبه د یو مالوماتي پلټفورم اړتیا:
ډېر ځله به مو یوه کلمه اورېدلې او لیدلې وي، غوښتي به مو وي، چې پر پښتو یې مانا راپیدا کړئ، خو په ګوګل یا بل سرچماشین کې به مو پر پښتو څه نه وي لیدلي، یانې پښتو د موادو له سخت کمښت سره مخ ده، پدې اړه وضاحت ته اړتیا نشته، ټول سره پوهېږو.
تراوسه پر پښتو ژبه داسې یو ادرس نشته چې د غوښتنې سره سم د خپلې خوښې ټول مواد پکې پیدا کړو، د یو داسې ادرس او پلېټفارم اړتیا او شتون هتمي دی.
موږ پر یوه پروژه کار پیل کړی، د پښتو ژبې د بډاینې په موخه په انټرنېټي دنیا کې یو داسې پلټفورم جوړ کړو. موږ په خپل فکر لاندې کار کول غواړو، که تاسې را سره خپل وړانديزونه او نظرونه شريک کړئ، له موږ سره به ډېره مرسته شوي وي.
داسې وېب سايت او مبایل اپلېکېشن جوړوو، چې کلمې، ويي، نومونه، اصطلاحات ور واچول شي، لغوي ماناوې او لنډ تعريفونه به وېب او اپلېکشن کې راځي. د بېلګې په ډول: استیضاح عربي کلمه ده، په انګلېسي کې (Impeachment) ورته ویل کېږي؛ په دري هم استیضاح ورته ویل کېږي. پښتو کلمه نده ورته جوړه شوې، پښتو رسنۍ یې هم استیضاح لیکي؛ که کره پښتو کلمه ورته جوړه کړل شي، پدې پلټفورم کې به یې لومړۍ کره پښتو معادله کلمه راځي، بیا به د استیضاح کلمې د ریښې په اړه بحث کېږي او بیا به پر دې لنډ مالومات ورکول کېږي، چې په عامو ادبیاتو کې استیضاح څه مانا لري؟ په سیاسي ادبیاتو کې څه مانا لري؟
- ځيني پښتو او دري ويي/کلمې چې د افغانستان په مختلفو سيمو کې بېلا بېل نومونه ورته اخېستل کېږي؛ سيمه ييز توپير يې په ګوته او له انځورونو سره تشريح شي. لکه مۍ - او - وريجي.
- په کره پښتو او دري او همدا ډول لهجوي توپير سره د کلمو تلفظ؛
- پلیټ فارم کې به لټون/search په داسې ډول برابر شي، چې املا کتنه يا spelling check ولري؛ په دې مانا چې که يوه کلمه په ناسم ډول وليکل شي، سمې بڼې يې وړانديز او په ګوته شي؛
- پلیټ فارم په داسې بڼې جوړ کړل شي، چې هر څوګ به په کې حساب يا اکونټ جوړولی شي؛ کارن به د پښتو ژبې بډاينې برخه کې مرسته/مشارکت/contribution کولی شي.
- ځيني انګلېسي، يوناني او لاتينو کلمو ته، چې پښتو او دري کې لفظي کلمې نه لري؛ د ژبپوهانو او استادانو په مرسته ورته مناسبې پښتو مترادفي کلمې پيدا کړلی شو؛
- د پښتو املا په برخه کې د ځينو کلمو پر سر اختلاف ته مو يو جامع حل پيدا کړی وي او دې برخه کې دغه ژبې اسانه کړی شو.
موږ غواړو د لوړو زده کړو وزارت په مرسته د افغانستان د ټولو پوهنتونو له استادانو سره د یو میکانیزم له مخې اړیکې ایجاد کړو او هغه مواد ترلاسه کړو، چې دوی محصلینو ته تدریس کړي دي، یایې تدریسوي، دا مواد تیار لیکل شوي دي، غواړو دې پلټفورم ته یې ور واچوو، ترڅو د ډېرو خلکو د لاسرسي وړ وګرځي. د بېلګې په توګه موږ په طبي برخه کې ډېر کار ته اړتیا لرو، د یوې ناروغۍ په اړه که یو پښتون لوستی انسان غواړي پوه شي، پر پښتو ژبه په انټرنېټ کې نشي پوهېدای، ځکه مواد نشته، مجبور دی، له نورو ژبو به ګټه اخلي. ښه دا ده، چې هغه متن چې مخکې لیکل شوي دي؛ خو انټرنېټي دنیا کې نشته دي د لاسرسي وړ وګرځي.
له تاسې څه غواړو؟
- پورته مسايل چې موږ ليکلي؛ ستاسې له انده څه بايد نور په کې ډېر او يا را کم کړو؛
- کوم څه له موږ پاتې دي، چې په کولو سره يې پښتو ژبه بډايه کېدای شي؛
- تاسې په لويه کې خپل مشورې، وړانديزونه او نظرونه را سره شريک کړئ؛ ترڅو په رېښتنې بڼه مو نوښت کړی وي.
ــــــــــــــــــــــ
خپل لنډ نظر او يا هم بشپړې طرحې مو پر لاندې لارو له موږ سره شريکې کړئ:
موبايل او واټس آپ شمېرې: 0766900007 --- 79168027112+
برېښناليک: mailrohi@gmail.com
موږ له وړاندې مننه کوو، ستاسې نظرونه راته د درناوي وړ دي.
