مفوض مدينة نيويورك حول تجربة المكان

۱. په داسې وخت کې چې نړۍ د افغان حکومت هر قرار او کردار ته بوڅ غوږونه نیولي، د افغانستان او خپل اختیاره نظام کورنی او بهرنی مخالفین د خپلی باطلی اداعا د اثبات له پاره هسي پلمی او بهانی غواړی، په داسې یو وخت کې ددې لیک لیکل او د امریکا د مشروعیت مهم رکن کانګریس له لارې د امریکایی ملت او دولت مخاطب ګرزول ډیر ژور، مهم او عمیق سوچ وو.

۲. دې لیک ته د افغان ـ امریکا جګړې د پای او د افغان ـ امریکا اړیکو د ۱۰۰مې کلیزی د مناسبت انتخاب، ددې ښوودنه کوی، چې نوی افغان حکومت د سیاسي نزاکتونو، ډیپلوماټیکو نورمونو، نړیوالو مناسبتونو او د یوه مشروع، مخلوع او د یوه ملت د استازی دولت بشپړ واکونه او ظرافتونه لری.

۳. د لیک محتوی، د متن شمیرلې الفاظ او د یوه خاص ډیپلوماټیک عرف څخه برخمن طرز، بل هغه څه وو چې د افغان حکومت ګڼ منتقدین او متخاصیم سیالان یې هیښ او حیران کړه.

۴. د لیک په متن او محتوی کې له پیل څخه تر پایه په ټوله کې د ۲ سیالو حکومتونو او ملتونو دریځ ساتل شوی او ددې ترڅنګ د لیک د طرز توګي بڼه ډیره سوله اییزه، رغونکې او هڅونکې وه.

۵. د لیک په پیل کې د افغان ملت د ملی شتمنۍ او پولي ذخیرو خلاصول غوښتل شوی، او زیاته شوی چې د افغانستان د شتمنۍ او پیسو کنګلول او اقتصادی بندیزونه له منطق لرې او د بشری ناورین سبب کېدای شي او همدارنګه روغتیا، معارف او د افغان ملت ګڼ ملکي خدمتونه زیانمنوي، چې د افغانستان د خلکو لپاره ښې پایلې نه لري.

۶. همدارنګه په ګران افغانستان کې د سرتاسرې او بې سارې امنیت یادونه شوی، افغان خاوره یې نړۍ ته له ګواښه مصونه یاده کړې او غوښتنه شوی چې اوس هغه وخت دی ترڅو نړۍ له افغانستان سره خپلي اړیکې او مناسبات ترمیم کړی. ځکه دا د افغانستان تاریخی غوښتنه دی، ترڅو افغانستان د نړۍ فعال، مسوول او یو رغونکې غړی واوسې.

۷. د ګڼو نورو موضوعاتو ترڅنګ امریکا ته ور یادول شوی دی، چې پرونی یرغل مو هم اشتباه وو او اوس هم که غواړی چې دا ستر ملت د اقتصادی بندیزونو او سیاسی فشارونو له لارې خپلو نارواه او ظالمانه غوښتنو ته تسلیم کړی، نو دابه مو د اشتباه په سر بله اشتباه وی، نو ښه دی چې له تاریخ څخه زدکړه وشي او د تقابل پر ځای د تعامل او همکارۍلاره خپله شي.

۸. په پای کې امریکا په اوږدمهال کې ګډو اقتصادی همکاریو او اړیکو ته هڅول شوی او یادونه شوی چې د زراعت، صنعت او د افغانستان ګرانبیه معدنونه ددغه مشروع، ګټورې او مهمې پانګونې د پیل په برخه کې ښه برخه کېدای شي.

د افغان حکومت د بهرنی سیاست د دستګاه دغسي نوښتګرد ګامونه، د سیمې له متخاصیمو هیوادونو سره د سیاسی، اقتصادی او څو وجهی روابطو د جوړونې په برخه کې وروستۍ د پام وړ هڅې او په ټوله کې د نړۍ له سترو قدرتونو سره د بي طرفه مګر فعال سیاست له دریځ، د باور جوړونې، د مناسباتو د پیل او په ټوله کې د یوه داسي وضعیت مخابره کول چې افغانستان به د همکاریو، تعامل او وصل محور وی، ډیر د ستایلو او قدرینی وړ ګام دی.

مګر لازمه او حتمي دی چې د حکومت ګڼ وزارتونه او ادارې خپله کارخانګې سمه سرته ورسوی او ددې ترڅنګ د حکومت مشرتابه د حکومتواله د یو مدون ډول د تعریف ترڅنګ، په لویه کې له اوسنې حالت څخه د ګذار په موخه، یوه منځه لارې ملي ستراتیژۍ هم تصویب او له دې لارې نړۍ ته د لا ډیر سازش او همکارۍ چانس ورکړی.