روهي (دوه نۍ/۳۰ د وري)، پخواني جهادي قومندان او د هرات پخواني والي تورن اسماعيل خان تېره ورځ هرات ولايت کې د خپلو ملاتړو يوه وسله واله ناسته رابللې وه. اسماعيل خان په يادې ناستې کې پر حکومت نيوکې کړې او خبرداري يې ورکړي دي.
ناسته چې د محمد اسماعيل خان په کور کې جوړه شوې وه، د نوموړي سلګونه وسله وال ملاتړي يې ورته غوښتل شوي وو. دغه ناسته کې اسماعيل خان ويلي دي چې د هرات په هرې ولسوالۍ کې په زرګونه وسله وال کسان لري.
نوموړي حکومت ته خبرداری ورکړی دی چې که چېرې حکومت د مجاهدينو د بې وسلې کولو هڅه وکړي، نو دی به اجازه ورنه کړي او پر وړاندې به يې توند غبرګون وښيي. اسماعيل خان وايي چې د اړتيا په صورت کې به د خپلو وسله والو کسانو پر مټ له هرات دفاع وکړي.
تورن اسماعيل خان ويلي دي چې د نظام د ساتلو پلوی دی او له نظام يې موخه ولسمشر او د هغې مرستيالان نه دي، بلکې درې ګونې قواوې دي، چې له سولې وروسته هم بايد پر خپل ځای پاتې شي.
