روهي (نۍ/۲۸ د وري)، وروسته له هغې چې د تېرې پنجشنبې په ورځ واشنګټن د مسکو پر وړاندې يو شمېر تازه بنديزونه اعلان کړل، د امريکا او روسيې ډپلماټيکي اړيکې يې سره کړکېچنې کړې.
تېره ورځ مسکو د امريکا د وروستۍ پرېکړې په غبرګون کې ویلي چې ۱۰ امریکايي ډیپلوماټان باید د روسیې له خاورې ووځي. همدا ډول د روسيې بهرنيو چارو وزير سرګي لاوروف ويلي دي، چې په مسکو کې د امریکا سفیر د لنډې مودې لپاره خپل هېواد ته ولاړ شي.
روسيې دا خبرداری هم ورکړی دی چې د امريکا پر وړاندې به ورته بنديزونه ولګوي او يو شمېر امريکايي شرکتونه چې په روسيه کې فعاليت کوي، د بنديزونو په نوملړ کې به يې واچوي.
