روهي (څلور نۍ/۲۰ د کب)، د افغانستان لپاره د ملګرو ملتونو ځانګړې استازې، دیبرا لاینز دوحه کې د افغان حکومت له مرکچي پلاوي سره کتلي.
دواړه لوریو ددې لیدنې پر مهال د افغان سولې پروسې اړوند وروستیو پرمختګونو، راتلونکو مرحلو، د سولې په اړه د سیمه ییزې او نړیوالې اجماع پر اهمیت او همدا راز د سولې خبرو کې د ملګرو ملتونو پر همکارۍ بحثونه شوي دي.
د افعانستان لپاره د ملګرو ملتونو ځانګړې استازې دیبرا لاینز پرون د قطر پلازمینې دوحې ته تللې، چې ویل کیږي نوموړي به په دې سفر کې د دواړو مرکچې پلاوو سره د لیدنو ترڅنګ د افغان سولې بهیر کې د ملګرو ملتونو پر رول خبرې وکړي.
