روهي ( دوه نۍ/ ۲۰ د سلواغې )،په کندز ولایت کې د وريجو پروسس او بسته بندۍ کې د پانګونې زیاتوالی راغلی.
د افغانستان صنعت او سوداګرۍ وزارت وایي چې د شعیب فیصل د وريجو د پروسس او بسته بندۍ فابریکه چې په ۱۳۸۸ لمریز کال یې په کندز ولایت کې د یو ملیون ډالرو په لومړنۍ پانګونې سره خپل فعالیت پیل کړی وه، اوس یې خپله پانګونه ۵ ملیونو ډالرو ته لوړه کړې ده.
د کندز ولایت د هیواد په شمال ختیځ کې یو له هغه ولایتونو څخه دی چې د وريجو د بیلابیلو ډولونو کښت کې ځانګړی شهرت لري .
د یاد وزارت ویاند فواد احمدي وایي دا فابریکه په یوه ورځ کې ۱۴۰ ټنو وریجو پروسس او بسته کولو توان لري او د کندزولایت 220. تنو اوسیدونکو ته يې د کار زمینه برابره کړې ده.
احمدي زیاتوي د شعیب فیصل د وريجو فابریکه خپل محصولات دکندوز ولایت سربیره ګاونډیو ولایتونو کې پلوري او ګاونډي هیواد تاجکستان ته يې هم صادروي.
