د راپورونو پر بنسټ روسیه کې د نېول شویو کسانو شمېر ۳۴۰۰ تنو رسېدلی

روهي (یوه نۍ/۵ د سلواغې)، په روسیه کې د حکومت د سیاسي مخالف مشر الکسي ناوالني د نیول کیدو پر ضد پراخو اعتراضونو کې زرګونه کسان نیول شوې دي.

نړیوالو خبري رسنیو یوازې په مسکو کې د اعتراض کونکو شمېر نژدې څلوېښت زره کسان یاد کړي خو په ټوله روسیه کې د اعتراض کوونکو شمېر بیا تر سل زرو زیات ښودل شوی دی. 

الکسي نوالنې شپږ میاشتې د مرګوني مسمومیت له امله په جرمني کې تر درملنې لاندې و، نوموړی د جنوری په ۱۷مه روسیې ته د بېرته ستنېدو پر مهال د مسکو  په هوايي ډګر کې ونېول شو. 

اوس د نوموړي د نیول کیدو په غبرګون کې په روسیه کې پراخ لاریونونه روان دي او ګڼ خلک د حکومت لخوا په دې اعتراضونو کې د ګډون له امله نیول شوې دي.