روهي (پنځه نۍ/۲۵ د مرغومي)، سرچینې وایي، چې د ۲۰ ولایتونو لوړپوړي افغان چارواکي د کورونا وېروس ضد ځانګړې شوې بودیجه کې د فساد په تور لویې څارنوالۍ ته ور پېژندل شوې دي.
تازه ځینو افغان چارواکو بي بي سي ته تائید کړې ده چې د لوګر، بامیان، کندوز، بغلان، خوست، پروان او دایکندي ولایتونو چارواکي د افغان حکومت د بازرس ادارې لخوا د کورونا سره د مبارزې لپاره ځانګړې بودیجه کې د فساد، اختلاس او له واک د ناوړه ګټې اخیستنې په تور لویې څارنوالۍ ته معرفي شوې دي.
سرچینه زیاتوي، چې په یادو کسانو کې د افغان حکومت شپږ اوسني او پخواني والیان، په ولایتونو کې د عامې روغتیا رئیسان او ځیني نور چارواکي شامل دي.
د فساد په تور د افغان چارواکو ددې وروستیو دوسیو په اړه د افغانستان لویې څارنوالۍ هم منلې چې په دې برخه کې دوی ته مالومات رسېدلې، خو په دې تړاو یې زیات مالومات نه دي په ډاګه کړي.
د سرچینو د مالوماتو په اساس ویل کیږي چې یاد کسان د لسګونه میلیونه افغانیو په فساد تورن دي.
