روهي (څلورنۍ/۳۰ د تلې)، د جمعيت ګوند جنجالي مشر صلاح الدين رباني او د دغه ګوند مرستيال احمد ضيا مسعود افغان حکومت پر کمزوري مديريت او د جګړې پر ناکامۍ تورنوي.
د حکومت دغه دوه پخوانيو سياسي څېرو د تخار ولايت د تېرې شپې پېښې په اړه په فېسبوکي خبرپاڼو کې ويلي دي چې تخار کې رامنځ ته شوې مرګ - ژوبله د حکومت د کمزوري مديريت له امله ده.
صلاح الدين رباني لېکلي دي چې د امنيتي ځواکونو پر وړاندې د حکومت بې مسووليتي او کمزورې مشري سبب شوې ده چې د امنيتي ځواکونو تلفات لوړ شي.
له بلې خوا احمد ضيا مسعود لېکلي چې په هېڅ وخت کې امنيتي ځواکونو ته دومره تلفات نه وو اوښتي، څومره چې د دغه حکومت پر وخت ورته رسېدلي دي.
تخار کې تېره شپه د طالبانو او افغان ځواکونو ترمنځ جګړه کې تر ۵۰ سرتيري چې د تخار د امنيه قومندانۍ د امنيت آمر هم په کې شامل دی وژل شوي او يو شمېر نور تر اوسه ورک دي.
د تخار د والي وياند رسنيو ته ويلي دي، چې بهارک ولسوالۍ کې د شوې جګړې په ترڅ کې طالبانو ته هم درانه تلفات اوښتي دي خو شمېرې يې نه دې ښوودلې.
