روهي (څلورنۍ/۹ د تلې)، نن ورځ د ولسي جرګې ناسته کې د افغانستان د پخواني ولسمشر ډاکټر نجيب الله د ۲۴ تلين غونډې د جوړېدو پر سر د وکيلانو ترمنځ اختلاف رامنځ او ناسته کې لفظي شخړه شوې.
د ولسي جرګې رئيس مير رحمان رحماني د ډاکټر نجيب الله په اړه ويلي دي چې جهاد مقدس دی، مقاومت مقدس دی خو هغه چې جنايت يې کړی دی مالوم او مشخص دي.
د ولسي جرګې ځينو غړو ويلي چې حکومت بايد اجازه ورنه کړي چې د داکټر نجيب الله د مړينې ۲۴ تلين غونډه ولمانځل شي، دوی ويلي دي چې دا ډول غونډې د افغانانو ترمنځ ستونزې پيدا کوي او شونې ده چې هېواد د کورنۍ جګړې پر لور لاړ شي.
ځيني نورو وکيلانو بيا ويلي دي چې افغانستان کې هېڅ قهرمان شتون نه لري او جهادي ډلو ټپلو د کورنيو جګړو پر مهال افغان وژنه کړې ده. دوی له حکومت وغوښتل چې پرته له هر ډول تعصب دې اجازه ورکړي چې خلک خپل مشران ولمانځي او دا د افراد بنسټيز حقوق دي.
