بنيامين نتنياهو داسرائیلو اولنی لومړې وزیر دی ، چې د اسراييلي دولت له منحته راتګ وروسته يې نړۍ ته سترګې پرانیستې دي. خلک یې د ( بيبي ) په نوم یادوي او ځینې يې هم ( جادوګر ) بولي، نوموړی پردې پوهیږي ، چې له رسنیو سره څنګه چلند وکړي او پر ځان یې راغونډې کړي . نږدې ټول پردې باور دي ، چې نتنیاهو دخپل مخالف لوري کمزوري اړخونه ډیر زر معلومولای شي . نتنیاهو په دې باور دی ، هره ځمکه چې داسراییلو سرتیرو يوځل رالاندې کړې له هغې څخه بیا تیریدل مناسب کار نه دی .
بنیامین نتنیاهوته دنده سپارل شوې ، چې د اسراييلو نوی حکومت جوړ کړي ، که څه هم له ده سره تقريباً ټولو ښي اړخه افراطي او مذهبي ګوندونو لاس يو کړی ، خو بيا هم تر اوسه په دې نه دی توانېدلی چې نوی حکومت جوړ کړي. ده ډېره هڅه وکړه چې د ملي وحدت د حکومت د جوړولو لپاره د زيپي لېوني په مشرۍ د کديما د ګوند موافقه او ملاتړ ترلاسه کړي ، خو داسې ښکاري چې لېوني په اپوزېشن کې پاتې کېدوته له نتنياهو سره تر ګډ کار ترجيح ورکوي. د ده له افکارو او سياسي پروګرامونو څخه په څرګنده ښکاري چې دی به له فلسطينيانو سره د روغې جوړې هڅې نورې هم ستونزمنې کړي، ځکه چې نتنياهو چمتو نه دی فلسطينيانو ته د دوی ځمکې بېرته ستنې کړي او يا د دوی خپلواک او جلا حکومت ومني ، بلکې هڅه کوي په اشغالي ځمکو کې د يهودو ښارګوټو ته پراختيا ورکړي او د زور له لارې فلسطینيان سولې ته مجبور کړي. که څه هم دا نسخه په وار وار ازمويل شوې او له ناکامۍ سره مخ شوې ، خو نه پوهېږم چې هغه يهود چې په زيرکۍ کې نړيوال شهرت لري ولې له خپلو ناکامو تجربو زده کړه نه کوي . په زړه پورې دا ده چې هر نوی لومړی وزير يو ځل د زور نسخه ازمويي او کله چې د هغې په ناکامۍ پوهيږي او غواړي خپله ناکامي جبران کړي ، بيا له واکه لرې کيږي، ترور کيږي او يا هم نه رغېدونکې کوما کې ننوځي او پر ځای يې بيا نوې تجربې ته مخه خلاصيږي.په هرصورت وګورو چې ، نتنياهو به دا ځل له خپلو تجربو سره څه وکړي.
بنيامين نتنياهو، چې اصلي کورنی نوم يې ( ميليکوفسکي) دی ، د1949 ز داکتوبر پر 21 نېټه په تل ابیب کې نړۍ ته سترګې پرانیستې او د امریکا دفلادلفیا په ایالت کې يې منځنۍ زده کړې بشپړې کړې ځکه پلار یې ( بیتریون نتنیاهو) هلته ځینې څیړنې کولې .که څه د ده ټول نيا او نيکونه په لېتوانيا کې زېږېدلي دي ، خو د ده مور او پلار متحده ايالتونو ته مهاجرت وکړاو هلته په مياپوليس کې استوګن شول. د نتنياهو پلار د کارنېل په پوهنتون کې د يهودو د تاريخ پروفيسراو د هېبرو انسايکلوپېډيا پخوانی ليکوال و.په خپله نتنیاهود مهنسۍ د دېپلوم تر اخيستو وروسته له مشهور امریکايي پوهنتون هارورډ څخه دچارو په اداره کې مسلکي زده کړې تر لاسه کړې، په 1967 ز کې ، چې اسرائيلو ته راستون شو سمدلاسه د پوځ په کوماندو برخه کې پر دنده وګومارل شو اوتر 1972 ز پورې یې دغه دنده تر سره کړه . او په هغه ډله کې يې برخه درلوده ، چې دفرانسې د هوايي کرښې له یوې تښتول شوې الوتکې څخه يې اسراییلي یرغمل راخلاص کړ ل. نتنیاهو یو څه وخت خپل ازاد تجارت هم وکړ بیا یې سیاسي ژوند پیل کړ .
دبنیامین نتنیاهو دژوند مهم پړاوونه په دې توګه دي:
v په 1972 ز کې د یوناتان د ترهګرۍ دمخنیوي د انسټیټوټ مدیر و .
v له 1973-1967 ز پورې په پوځ کې مامور و .
v په 1984 ز کې په ملګروملتونو کې داسراییلو سفیر شو .
v په 1988 ز کې پارلمان ته ولاړ .
v له 1992-1991 ز دبهرنیو چارو مرستیال وزیر و .
v په 1991 ز کې دمادرید کنفرانس مهم غړی و .
v له 1996-1992 ز کې بنیامین نتنیاهو په پارلمان کې دبهرنیو ، امنیت ، قانون او قضاء دڅانګو غړی و .
v په 1996 ز کې داسراییلو لومړې وزیر شو . نوموړی هغه مهال چې د46 کلونو و ،داسراییلو په تاریخ کې تر ټولو کشر لومړې وزیرګڼل کېده.
v په 1999 ز په ټولټاکنو کې مات شو .
v د2003-2002 ز تر منځ دبهرنیو چارو وزیر و .
v په 2003 ز کې دمالیې وزیر و .
v په 2005 ز کې یې له غزې څخه له شاتګ سره دمخالفت او اعتراض په توګه له وزارته استعفا ورکړه .
v په 2005 ز کې دلیکود مشر شو .
لیکود ګوند
دغه ګوند په 1973 ز کې دحیروت ګوند پر بنسټ ، چې په 1948 ز کې میناخېم بیګن تاسیس کړې و، رامنځته شو. دواړو ګوندونو صهیونیستي تګلوری درلود او په لویه کې دولادیمیر جابوتنسکي له ګوند ، چې په 1925 ز کې یې فعالیت کاوه اغیزمن و . دغه ټول دلوی اسراییل دمفکورې له پلویانو څخه و ، چې داردن دسیند ختیځه تړانګه یې خپله خاوره بلله .
دلیکود ګوند لیبرال ښي اړخه صهیونيستي ګوند دی او دنوو محافظه کارانو پرفکر باور لري. دبنیامین نتنیاهو سربیره میناخیم بیګن ، ارییل شارون ، اسحاق شامیر ددغه ګوند مشران تیر شوي دي . لیکودګوند په 1977 ز کې وتوانیده ، چې په ټاکنو کې بریالې شي نږدې نیمه پيړۍ په اسراییلو کې سیاسي واک له کیڼ اړخو سره و . لیکود تل په ټاکنو کې ونډه اخیستې کله به يې داسراییلي حکومت مشري تر لاسه کړه او کله به دپياوړي اپوزیسیون په توګه وځلیده .
دګوند په تاریخ کې 1981 ز کال له بریالیتوبه ډک کال و او په پارلمان کې یې 48 څوکۍ تر لاسه کړې وې او په 2006 ز کې یې ډیره بده ماتې وخوړه او ایله يې 12 څوکۍ ګټلې وې .
نتنیاهو په انګلیسي روانې خبرې کوې اوهغه مهال دشهرت اوج ته ورسیده ،چې کله په ملګرو ملتونو کې داسراییلو استازې شو او دخپل هېواد له تګلارو یې کلک ملاتړ کاوه .
دسیاست ترڅنګ نتنیاهو څو کتابونه هم کښلي، چې ځینې یې په دې توګه دي :
ترهګري : لویدیځ به څرنګه کامیاب شي 1986 ز
نړیواله ترهګري ، ګواښ او ژغورنه 1991 ز
دملتونو ترمنځ ځای ، اسراییل او نړۍ 1993 ز
له ترهګرۍ سره مبارزه ، دیموکرات حکومتونه به څرنګه له نړیوالې او سیمه ییزې ترهګرې سره مبارزه وکړي 1995 ز .
نتنیاهو له فلسطینیانو او عربانوسره خپله دښمني نه پټوي، کله چې لومړی وزیر شو دغه درې خبرې یې ډیرې مشهورې شوې ( نه بیت المقدس ، نه دمهاجرینو بیا راګرځیدنه ، نه د اسراییلو دناقانونو کورونو ړنګونه ) ، خو موږ به پای کې ورپسې زياته کړو چې نه کاميابي.
