کله چې د ولسمشر حامد کرزي دوره پای ته ورسیدله ، ټولو دا خبره کوله چې بدیل یې باید څوک شي؟
که څه هم ډېری ولس د حامد کرزي څخه خفه وو، ځکه چې د نوموړي دوره کې پراخ فساد او بې عدالتي اوج ته رسیدلې وه !
ولسمشر محمد اشرف غني د لسګونو نوماندانو په منځ کې دغه ملت د دې لپاره خوښ کړ چې د مثبت بدلون او اصلاحاتو خبره یې کوله ، هغه په دې برخه کې تر تېر حکومت یو څه لاسته راوړنه هم لري ، خو د دې سره سره اداري فساد یې لمنځه یو نه وړ، په ډېرو برخو کې یې بې ګټې مصلحت وکړ.
په یو ځای کې به یو زورواکي ته سزا ورکړه، په مقابل کې به یې بیا بل زورواکي ته نور رشد ورکړ.
دا ښه خبره وه چې نړیوالي ټولنې سره یې اړیکي ښې کړې، خو دا بیا ښه خبره نه وه چې کله کله به د نړیوالې ټولنې لخوا به په ولسي وګړو بمبار کیده، دی به ورته په چپه خوله وو.
د ولسمشر محمد اشرف غني په اړه زما قضاوت دا دی چې هغه په ځينو برخو کې مثبت او په ځينو برخو کې منفي حرکات وکړه!
دا اوس چې تر لسو (۱۰) پورې د احتمالي نوماندانو خبره کیږي ، تر دې نوماندانو اوس هم ولسمشر محمد اشرف غني د وطن په ګټه دی، په دې نوماندانو کې داسې نوماندان شته چې زیاتې پیسې، امکانات او یا خارجي ملاتړ لري، د ښه شخصیت او ښې برنامې کسان نه تر سترګو کيږي!
خو په دې نوماندانو کې د یو نوماند نوم هم اخیستل کیږي چې هغه ډاکتر فاروق اعظم دی، خو ډاکتر صاحب د دوی برعکس پیسې نه لري خو شخصیت لري!
ډاکټر فاروق اعظم هغه څوک دی چې هم په نړیواله کچه او هم په هیواد کې د ننه، د یو لوړ شخصیت او د هیواد د یو خواخوږي او ښه سیاستوال په توګه ټول پیژني ، که هغه په رښتیا سره صحنې ته راداخل شي ، هم د نړیوالې ټولنې سره ګډه ژبه پیدا کولای شي، او هم په هیواد کې دننه ملې اجماع د جوړولو توان لري، د دې ترڅنګه سوله چې د دغې هیواد ستر ضرورت دی، د خلیل زاد په ټاکلو سره نړیوالې ټولنې هم هڅې را پیل کړي دي.
داکتر صاحب فاروق اعظم په دې برخه کې مهم رول ادا کولای شي، ځکه چې دی د طالبانو سره هم په ژبه پوهیږي، د لوړې کچې عصري علم ترڅنګ دیني علم هم په لوړه کچه لري.
دی د مجاهدینو د رهبرانو په ډله کې په یو متقي خیرخوا او سوله غوښتونکي انسان باندې مشهور دی.
د ډاکتر صاحب تقوا ټولو ته معلومه ده ، ځکه چې د جهاد رهبریت یې وکړ او د دې تر څنګ یې د دوه وزارتونه د وزیر په ټوګه دنده هم پر مخ بېولې ده، خو دی اوس هم په کابل کې په کرایه کور کې اوسیږي!
په پای کې بیا دا خبره د یو دردمن افغان په حیث کوم!
تر څو چې رښتیني اراده رامنځ ته نشي، ګمارنې مو د تقوا پر بنیاد ونه شي، کار د اهل خلکو ته ونه سپارل شي، هیڅکله د ښې ورځې په تمه مه پاتې کیږئ!
ملت باید نور د چا په تشو وعدو ونه غولیږي.
