د ټاکنو  کمېسیون د دارلانشاء ریس په ټاکنه کې تر سیاسي فشارونو  لاندې

د ټاکنو خپلواک کمېسیون کې چې په ورستیوو کې د ډاکتر عبدالله او ولسمشر غني ترمنځ د ترسره شوې تفاهم لیک پراساس پکې د اصلاحاتو په نوم پکې نوي ۷ تنه کميشنران ځای پرځای شول اوسمهال په حکومت کې دځینو کړیوو د ولسمشر د  دویم مرستیال سرور دانش او اجرایه ریس لخوا د دارلانشاء ریس په ټاکنه کې  تر سخت فشار لاندې دی.
د ټاکنو کمېسيون څه باندې یوه میاشت د مخه د درالانشاء ریس دټاکلو لپاره دټاکنو قانون د۱۰ او ۲۲ مادو سره سم شفافه پروسه پرمخ یوړه چې د ۷۶ تنو نوماندانو لخوا ۲۵ تنه انټروي ته وړ وپیژندل شو او بیا وروسته له دې کسانو ۹ تنه وړ او زیاتو نومرو  اشخاص  د طرحو لپاره کمېسیون ته وروبلل چې بلاخره کمېسیون دټاکنو قانون  د۲۲ مادې دریم بند له مخې ۳ تنه ولسمشر ته وړاندیز کړل چې دا مسله تراوسه په حکومت کې دناندرو  او خنډونو سره مخ شوې  او په لویه کې سرور دانش او ډاکتر عبدالله او دولسمشر غني په ټیم کې هم ځیني کسان چې ولسمشر سره لس کلنه ملګرتیا نلري هڅه کوي  د نوموړو درې تنو پرځای  لیست ته د خپلې خوښې وړ کسان ور ننباسي او همدا سبب شو چې په ارګ ماڼۍ او سرور دانش په دفتر کې کمېسیون غړي زیاتو مجلسونو ته ور وبلي او له هغوي څخه د نورو کسانو د لیږلو غوښتنه وکړي او یو ډول فشار پرې راولي.
 دبلې خوا ډاکتر عبدالله په کمېسیون کې خپلو سیاسي ملګرو په مټ هم پراخه هڅه وکړه ترڅو  خپل ملګري زیات کړي چې بلاخره د کب په ۸ نېټه په کمېسیون کې دکميشنرانو ترمنځ بحث صورت نیولی او دحکومت په فشارونو  يې ۶ تنه نورکسان د پخوانيوو درې کسانو دتاید ترڅنګ د کمېسیون دمرستیالې بادغیسۍ په لاسلیک مکتوب ارګ ته لیږلی او د کمېسیون ریس نجیب الله احمدزي  دنورو ۶ تنو د معرفي کولو مکتوب دلیږلو په اړه  خپل مخالفت په مخامخ لیدونو کې  ولسمشر، دویم مرستیال سرورد دانش، ډاکتر عبدالله او د کمېسیون غړو  سره ښودلی دی.
د کمېسیون د مرستیالې بادغیسۍ لخوا  ارګ ته په لیکل شوي مکتوب کې چې  د کب په ۸ اتمه د۷۴۱ شمیره لري لاندې ټکي دیادولو او بحث وړ  دي.

لومړی داصولو  او دفتري مقرراتو له مخې د کمېسیون دریس په شتون کې د مرستیالې په لاسلیک سره ولسمشرۍ ماڼۍ ته د مکتوب لیږل داصولو  او نورمونو خلاف کار دی او داسې انګیرل کیږي چې په کمېسیون کې یوه ډله شته چې سر له اوسه د کمېسیون خپلواکۍ پرځای  اشخاصو او سیاسیونو ته درناوی لري چې دا کار د دوي راتلونکی تر پوښتنې لاندې راولي.

په مکتوب کې خپله دوي لیکلي چې پخواني درې تنه لیږل شوي کسان برتر او لایق دي  چې پدې کار سره دکمېسیون غړي په خپله پرځان عریضه کوي چې د هغې درې نورو ترڅنګ شپږ تنه چې له هغوي کمې نومرې وړي او هم يې وړتیا کمه ده ولې  ولسمشر ته ورمعرفي کوي؛

په مکتوب کې دپخوانيوو درې تنو دلیږلو په اړه دټاکنو قانون ۲۲ مادې دریمه فقره صراحت لري چې کمېسیون یوازې درې تنه په شرایطو برابر کسان ولسمشر ته لیږي او ولسمشر ترې یوتن غوره کوي د۶ تنو نور لیږلو لپاره هیڅ قانوني سند شتون نلري.

پخواني وړاندیز شوي درې تنه د کمېسیون د ۷ تنو غړو څخه ۴ تنو لاسلیک کړي او ۳  تنو يې له لاسلیک څخه د فشارونو له امله ډډه کړې ده  چې د قانون او اصولو له مخې دریس رایه چې هرې خواته وي په دوه حسابیږي پدې مانا چې ۵ تنو لاسلیک کړي او دنوموړو درې تنو مکتوب د ریس په لاسلیک لیږل شوی دی خو له دې مکتوب څخه دا په  ضمني ډول ثابتیږي چې پخواني درې تنه تر ټولو غوره او وړ کسان دي او د وړتیا ترڅنګ دټولو کمېسیون لخوا تاید دي.

کمېسیون چې په خپله قانوني پریکړه چې په قانون کې صراحت لري دریدلی نه شي او بل داسې مکتوب چې هیڅ قانوني بنسټ نلري لیږي په ټولنه کې دکمېسیونونو په اړه بایلل شوې باور نور هم زیانمنولی شي او ددې امکان شتون لري چې په راتلوونکو پارلماني ټاکنو کې دکمېسیون دپریکړو پرځای سیاسي جوړ جاړي او یاهم دحکومت په خوښه پکې کسان تغیر او تبدیل شي چې دا کار به  بیا د کمېسیون لپاره جبران نا پذیر وي او دیو ستر بحران زیږنده شي.

له دې پورته ټکو څخه معلومیږي چې ټاکنیز کمېسیونونه تر اوسه هم د حکومت او سیاسي شخصیتونو د فشارونو او تاثیر لاندې دي او ددې تضمین شتون نلري چې دوی دې په خپلواکۍ سره چارې پرمخ یوسي او هغه ګوتو په شمیر کسان چې قانون او دخپل ملت ګټو ته ژمن دي رایه به یې تل په اقلیت کې پاتې شي.
حکومت کې په ټاکنیزو کمېسیونو باندې خپله فشارونه په عمل کې کم نه کړي او دهغوي خپلواکۍ ته ارزښت ورنکړي نو راتلوونکو ټولو ټاکنو قانونیت، سراسریتوب، خپلواکي او روڼوالی تر پوښتنو لاندې راولي او خدای مکړه یوځل بیا به دا د ولسواکۍ تمثیلوونکي ارګان به د حکومت ا وسیاسي شخصیتونو د بزکشۍ میدان په توګه وګرځي.