د چین د بهرنیو چارو وزارت یو ځل بیا د امریکا د منتخب ولسمشر هغه وړاندیز رد کړ چې ویلي یې دي، د امریکا له بهرنۍ تګلارې څخه به د چین او تایوان ترمنځ د معاملې لپاره کار واخلي. ډونالډ ټرمپ ویلي چې له تایوان سره دې بیا خبرې اترې وشي.
د چین د بهرنیو چارو وزرات ویاندې لو کانګ پرون وویل، د واحد چین پر پالیسي خبرې اترې نه شي کېدای.
واشنګټن له هغې وروسته چې په ۱۹۷۹میلادي کال بېجنګ له تایوان سره اړیکې ټینګې کړې، له تایوان سره غیر رسمي اړیکې ساتلي. چین د تایوان خپلواکه ټاپو د خپلې خاورې یوه برخه بولي.
د چین د بهرنیو چارو وزارت ویاند ویلي، د چین د خلکو جمهوري حکومت یوازینی مشروع حکومت دی چې د چین استازیتوب کوي. دا هغه حقیقت دی چې نړیوالې ټولنې په رسمیت پېژندلی او هېڅ څوک نه شي کولای هغه بدل کړي.
د اسوشېټېډ پرېس اژانس د راپور له مخې د امریکا منتخب ولسمشر ډونالډ ټرمپ په هغې مرکه کې چې د جمعې په ورځ یې له والسټریټ ژورنال ورځپاڼې سره کړې، ویلي چې د چین په ګډون ټول مسایل د خبرو اترو وړ دي.
د ټرمپ دغه وروستۍ څرګندونې د دې نښه ده چې له چین سره د متحدو ایالتونو اړیکې به په تېره بیا د ټایوان پر سر ټکان وخوري.
چین له دې مخکې هم د ټایوان له ولسمشرې تسای اینګ ون سره د ټرمپ د ټیلفوني خبرو پر سر په غوسه شوی و. دواړو مشرانو د ډسمبر په ۱۲مه په خپلو کې خبرې کړې وې.
چین د تایوان له مشرې سره هر ډول جلا اړیکه خپل ځان ته لوی سپکاوی بولي.
ټرمپ هغه مهال له یوه ټلویزیون سره په مرکه کې ویلي و چې دی احساس نه کوي چې د چین واحدې پالیسۍ ته ځان ژمن وبولي خو په دې شرط چې که د دې موضوع او د سوداګرۍ د نورو مسایلو په اړه له چین سره توافق ته ورسېږي.
ټانګ یونګ هانګ چې په زیامن پوهنتون کې استاد دی، وایي، ټرمپ نړیوالې اړیکې د یوه سوداګر په منطق سره څېړي او غواړي وویني چې چین په دغو لمسونو سره څه ډول غبرګون ښیي.
