د راپورونو له مخې د سوريې د اعزاز ښار په يوه چاودنه کې لږ ترلږه ۱۵ تنه وژل شوي او لسګونه نور نور ټپيان دي.
د اعزاز ښار چې د سوريې په شمال کې د ترکيې له پولې سره نږدې پروت دی او د حکومت مخالفو وسله والو تر ولکې لاندې دی.
ویل کېږی چاودنه د دغه ښار د ګڼې ګوڼې په يوه بازار کې شوې او ډېری وژل شوي کسان هم ولسي وګړي دي. په بريتانيا کې د سوريې لپاره د بشري حقونو د څار ډله په دغه چاودنه کې د وژلشوو شمېر ۱۵ تنه ښيي خو ځينې نورې خبري رسنۍ بيا د وژل شوو شمېر زيات ښيي او وايي کېدای شي تر ۶۰ تنو په دغه پېښه کې خپل ژوند له لاسه ورکړی وي.
د اعزاز ښار د څو مياشتو لپاره د داعش ولکې لاندې و خو وروسته د حکومت مخالفو وسله والو ډلو لاس ته ورغی. تراوسه نه ده معلومه چې دغه بريد چا کړی او نه يې هم چا پړه منلې ده. څواوونۍ وړاندې له حلب ښاره يو زيات شمېر کډوال دلته مېشت شوي وو.
