له ټولټاكنو وروسته چې كله د ولسمشرۍ لپاره اچول شوې په سلو كې لس رايې و شمېرل شوې نو په دې رايو كې غوڅ برى ولسمشرۍ ته د نوماند حامد كرزي په برخه وو. له همدې سره جوخت رسنيو خبر خپور كړ چې د ښاغلي كرزي دې نسبي بري ځينې لوېديځوال چې خپله ګټه يې د ښاغلي كرزي د سياسي رقيبانو په بري كې لټوله ورخطا كړل او په دوهمه ورځ سرسامه ارګ ته دفشارپه خاطر ښاغلي كرزي ته ورغلل ، د ښاغلي كرزي بريا له دوى څخه دموكراسي، د ټولټاكنو ارزښت، موخې، دومره لګښت، د ټولټاكنو غرض او غوښتنې هر څه هېرې كړې او په ارګ كې يې پر هغه فشار راووړ چې يا ټولټاكنې دوهم پړاوته وغورځوي، يا له خپلو سياسي مخالفينو سره چې د ده پر وړاندې يې غوڅه ماته خوړلې ائتلافي حكومت جوړ كړي او يا به دوى پروپاګند كوي چې په ټاكنو كې پراخه درغلي شوې او د ټاكنو په مشروعيت او تقدس پسې تبر راواخلي.
د پاتې رايو شمېر دا وښوده چې د ټولو رايو ۶\۵۴ په سلو كې ښاغلي كرزي اونورې ۴\۴۵ په سلو كې يې پاتې ۴۱ كانديدانو وړې دي چې په اوسط ډول د يو تن په سر څه باندې يو فيصد وررسېږي اوس چې د رايو شمېرل پاى ته ورسېدل، د ټاكنو كمېسيون خپلې پايلې اعلان كړې بيا هم د ښاغلي كرزي بهرني او كورني مخالفين په ارام نه كېني، د شكاياتو كمېسيون ته يې زرګونه بې سنده شكايتونه وړاندې كړل او چې هغه يو هم ثابت نشو نو اوس په نورو لاروچارو فكر كوي ،په دې وروستيو كې د ټاكنو خپلواك كمېسيون او د شكاياتو د اورېدلو كمېسيون دې موافقې ته رسېدلي دي چې له څه باندې درې زره مشكوكو محلونو څخه به په نمونوي توګه په سلو كې لس رايې و شمېري او بيا به په ټولو محلونو د همدې لس په سلوكې له مخې حكم كېږي. كه څه هم دا كار نه د ټاكنو له قانون سره برابر دى خو بيا هم حكومت ورته ځكه غاړه كېښوده چې ستونزه حل شي.
نو كله چې دا نمونوي رايه شمېرل پاى ته ورسېږي په كار ده چې د قضيې ټول اړخونه يې پايلې ومني. نورپكې ډكي و نه وهي او نه د پلمو جوړولو لپاره فكر وكړي ځكه چې افغانستان په ډېرو نازكو حالاتو كې دى له هرې خوا له ګواښونو سره مخ دى او كوچنۍ خبره يې هم نا امنه كولى شي، همدا اوس د افغانستان سلګونه كورني او بهرني دښمنان په كمين كې ناست دي چې څنګه اوبه خړې كړي او كبان پكې ونيسي.
كومو كسانو چې په ټاكنو كې ماته خوړلې په كار ده چې په ډېرمروت او افغاني مېړانه خپله ماته ومني. ددموكراسئ له اصولوسره سم بريالي كانديد ته مباركي وركړي، او كه د سياست مينه لري نو د راتلونكې لپاره دې سياسي مبارزه وكړي او په دموكراتيكه فضا كې دې ټاكنې وګټي.
دا خو ډېره نامناسبه خبره ده چې څوك په ټاكنو كې ماته خوري، بيا حكومت ته د امنيت خرابولو دړكې وركوي، ولس وېروي، او يا د بهرنيو لمن نيسي چې په زوره ورته په حكومت كې ځاى پيداكړي. كه ائتلافي هدف مقصود وي نو بيا ټاكنې د څه لپاره، دا دومره لګښتونه، زحمتونه او ويني توئيدنې د څه لپاره؟
بهرني اړخونه هم بايد له خپلې بړستنې پښې و نه باسي. خپل حدود، ماموريت او دندې دي وپېژني د ائتلافي حكومت د جوړولو، يا دوهم دورته د ټاكنو د لېږدولو پر موضوع د دوى ډېر فشار افغانان په خپلو چاروكې لاسوهنه بولي، او هېڅوك هم په خپلو كورنيو چارو كې د پرديو لاسوهنه نه زغمي. دوى هم بايد د افغانستان نازك شرايط درك كړي او په لوى لاس هم ځانته او هم افغانانو ته ستونزې را و نه پنځوي.
