
د افغانستان د ځوانانو دعلمي او اسلامي ټولنې لخوا!
په دې وروستیو کښې د حزب اسلامي وتلي غړي او لیکوال استاد قریب الرحمن سعید د امت شاهین کتاب د چاپ لپاره اماده شو.
مونږ د دې لیکنې په ترڅ کښې د محترم استاد له دغه زیار څخه چې د اسلامی نهضت د ګلبڼونو موسس او د هغه د لوړ الوت او پرواز تصویر يې په کښې کښلی دی د زړه له تله مننه کوو او د ده د قلم او لیکنو د لا تاندېدو په هیله د ده نورو بریاوو غوښتونکي یو.
د امت شاهین کتاب د افغانستان په نه ماتېدونکې غرونو کښې د ابدالي او غزنوي شاهینې پروازونو او الوت پر لاره د وتلي اسلامی لیکوال او مجاهد انجنیر حکمتیار حفظه الله له ژوند څخه بحث کوي او د اسلامي امت د دغه زړور او عزم او ارادو د سرلوړي شاهین د ژوند پېښې او سیاسي بهیر مونږ ته وړاندې کوي.
د امت د شاهین د اسلامي نهضت د ویاړونو د کاروان او قربانیو د لارښوونکې د عزم او ارادو څرک او پته راکوي او مونږ د هغه سرلوړي مجاهد د ژوند له پړاوونو سره ګام په ګام د عظمتونو او شهکارونو لوستلو ته رابولي.
داسلامی نهضت د موسس ژوند او او له هغه څخه بحث کول د تاریخ د یوې سترې حماسې د څېړلو بابونه جوړوي هغه چې د اسلامي نهضت له تاسیس سره د سرولښکرو او کمونېزم په وحشتونو یې د تل لپاره یو دروند ګوزار وکړ او نړۍ یې د دغه سره سېلاب له وینو څښونکو څپو وژغورله او د صلیبي او وحشي یرغلګرو امریکایانو د تصفیې وروستی بری راوړنکي غېشي یې په لیندو کښې ساتلي دي.
د اسلامی امت د بچیانو لپاره د حماسو د دغه ستر تاریخ لیکل او ورته وړاندې کول به د امت په زړونو کښې د نوو حماسو د راټوکېدلو د ویاړ مینه ماته کړي او په مړاوو هیلو کښې به د ژوند نوې مینه او د انقلابونو او له توپانونو سره د مقابلې هیلې راوټوکوي.
د افغانستان د ځوانانو علمي او اسلامي ټولنه یوځل بیا له محترم استاد څخه مننه کوي او د اسلامي نهضت د ټولو غړو لپاره د ده دا ستر خدمت د تقدیر وړ ګڼي او دعا کوي چې په سرلوړي افغانستان کښې اسلامي نظام حاکم او د امت د شاهین هیلې ترسره شي
په درنښت
د افغانستان د ځوانانو د علمي او اسلامي ټولنې د فرهنګي کمېټې مسئول انجنیر حزب الله معیني
کابل افغانستان