نوراحمدعايل
يوۀ ١٧ کلن چينايي ځوان چې د اې پډ٢ د اخيستلو سخت لېوال و، د اخيستلو لپاره يې په داسې چارې لاس پورې کړ،چې سارى يې نه و ليدل شوى.
(جي ينگ) چينايي ځوان چې د اې پډ ٢ د اخيستلو وس يې نه درلود په انټرنېټ کې د پيسه دارکېدو لپاره له ډېرو پلټنو وروسته دې پايلې ته ورسېد ،چې خپل يو پښتورگى په ٢٠٠٠٠ چينايي (ينو) چې د ٣٠٠٠ امريکايي ډالرو معادل دى وپلوري.
نوموړي ډېر ژر د خپل پښتورگي د پلورلو لپاره يو دلال پيدا کړ ؛ دلال يو روغتون ته بوت او وروسته له دې چې د عملياتو په لړ کې يې له نوموړي څخه پښتورگى وکيښ ډېر ژر (جي ينگ) روغتون ته نږدې د اېپل پلورنځي ته ورغى ، په زړه پورې داده چې کله پلورنځي ته ورغى يو دم يې له اې پډ څخه زړه واوښت او په لاس کې لرلو پيسو يې يو ايفون او مک بوک وپېره.
وروسته له دې چې کله (جي ينگ) کور ته ځي مور يې په موضوع خبرېږي د پوليسو ادارې ته مراجعه کوي ، پوليس څېړنې کوي ؛ له څېړنو وروسته معلومه شوه چې هغه روغتون چې دا پښتورگى يې له (جي ينگ) څخه کيښلى قانوني جواز نه لري ،خو اوس روغتون د (جي ينگ) د پښتورگي له کښلو څخه سوچه نټه کوي او وايي چې موږ دا کار نه دى کړى.
په هرحال اوس دا ځوان د خپلې خوښې موبايل لري اما ايا رښتيا هم دا موبايل په دې ارزېدۀ ،چې پښتورگى پرې ورکړي؟
