د امريکا د دفاع نوی وزير او سي ای اې مشر ټاکل کيږي

د امريکا جمهور رييس بارک اوباما پرېکړه کړې، چې د دفاع وزير او د سي ای اې نوی مشر وټاکي. د رېپوټونو له مخې د سي ای اې اوسنی مشر  ليون پنيتا به  د دفاع وزير په توګه د رابرټ ګېټس پر ځای وټاکل شي او جنرال ډېوېډ پيټريوس ته به د سي ای اې د استخباراتي ادارې مشري ورکړل شي.
ځينې امريکايي چارواکو، چې نه غوښتل نومونه يې په ډاګه شي ويلي، چې اوباما به نن ورځ دغه بدلون اعلام کړي او نوموړي به په راتلونکې څو مياشتو کې  سنا ته د رايې اخستلو په موخه  معرفي شي.
د سي ای اې اوسنی مشر  ليون پنيتا په هکله ويل کيږي، چې په سپينه ماڼۍ کې ډېره کاري تجربه لري او په ديرشو هېوادنو کې يې د افغانستان په شمول حضور درلود.
ځينې باوري سرچينو ويلي، چې په افغانستان کې جنرال ډېوېډ پيټريوس  پر ځای به (( جان الن)) وټاکل شي او کېدای شي ولسمشر اوباما ریان کروکر افغانستان  ته دسفیر په توګه  وټاکي .
کروکر ،چې تېر کال ېې تقاعد واخیست  له 2009-2007 ز پر مهال په عراق کې دامریکا سفیر و دا هغه پړاو دی ، چې پخواني ولسمشر جورج بوش عراق ته اضافه سرتیري استولي و .
دیادونې ده ،چې کروکر په 1982 ز کې  په بیروت کې دامریکا سفیر و دا هغه مهال و ،چې اسراېېلو پر بیروت  برید کړې و .
په 1983 ز کې په لبنان کې دامریکا سفارت  او امریکايي سمندري ځواکونه  په نښه شوې و.
سرچینه دخپل نوم دنه ښودلو په شرط وايي : کروکر دنورو نوماندو له منځه  دا چانس لري ،چې په افغانستان کې دامریکا سفیر شي . نوموړی به داسې مهال ټاکل کیږي ،چې ولسمشر اوباما ژمنه کړې ده ،چې سږ دوبی به له افغانستان دخپلو 100 زره سرتېرو دراویستلو لړۍ پیلوي  اوس په امریکا کې دافغانستان له جګړې سره  دملاتړ کچه  ورځ تربلې راکمیږي .
دیادونې ده ،چې دولسمشر کرزي  او اوسني سفیر کارل ایکنبري ترمنځ اړیکې  ډېرې ترینګلې دي او ان دا هم ویل کیږي ،چې په افغانستان کې امریکايي ډیپلوماتان  او نظامیان هم خپلمنځي اختلافات  دي ،چې ښه بېلګه ېې دناټو او امریکايي ځواکونو دپخواني قومندان  ستانلی مکریستال او سفیر کارل ایکنبري  دترینګلو اړېکو ده پر ایکنبري تور دی ،چې له ولسمشر کرزي  او افغان حکومت سره ېې د ښو اړیکو درامنځته کولو په چاره کې ناکام شوې دی .