بيا يې خواږه خواږه يادونه په ما لوبې کوي
بيا يې خندا ده چې زما په ژړا لوبې کوي
بيا مې ریښې ریښې لمنه له اغزو ډکه ده
بيا د خزان سیلۍ د ګل په خندا لوبې کوي
بيا مې ځلېږي د بڼو په سر لړزانده ستوري
بيا مې د تورې شپې قسمت، په رڼا لوبې کوي
مغل کاته يې هیروي رانه انګریز وختونه
خوشحال غیرت مې د شملې په رپا لوبې کوي
خمونه تش، ساقي خمار، زه دعمرونو تږی
بدل محال دی صراحي په صهبا لوبې کوي
کله دما، کله دتا، کله د بل غیږه کې
لولۍ دنيا ده، هم په ما هم په تا لوبې کوي
د زړه ټوټې ټوټې ښیښه مې د آشنا په لاس کې
لکه ماشوم يې د شغلو په ځلا لوبې کوي
هغه چې وژني مې په مړي مې هم هغه ژاړي
شهیده ساه مې د قاتل په ژړا لوبې کوي
ګلبویه زلفې يې خورې ورې د باد په اوږو
لکه قصې د مینتوب چې په چا لوبې کوي
نه مې ماضي په شغلو پټ نه مستقبل په ستورو
پرون ایرې، نن مې لوګی په صبا لوبې کوي
آلمان ۶ مارچ ۱۹۹۴
شاعر: صديق کاوون توفاني
ترتیب کوونکی : عبدالقادرمسعود
