روهي ( جمعه / ۱ د کب )، د کورنیو چارو وزیر مسعود انداربي وايي، د لویو لارو د ستونزو هوارولو ته پر وخت رسیدګي کیږي.
نوموړي د ترانسپورټي شرکتونو له مسؤلینو سره لیدنه کې هغوی ته پر لویو لارو د ستونزو د هوارولو ډاډ ورکړی دی.
اندرابي ویلي چې د ولایتونو امنیه قوماندانانو ته دنده سپارل شوې چې د لویو لارو د ستونزو هواري پخپلو کاري لومړیتوبو کې ونیسي او هره ورځ د خپل کار نتیجه له کورنیو چارو وزارت سره شریکه کړي.
د افغانستان په یو شمېر لویو لارو کې د تګ راتګ کوونکو باروړونکو لاریو سلګونو چلوونکو د هغه څه له کبله د دوو اونیو راهیسې کاربندیز کړی، چې د پولیسو له خوا ترې په ناقانونه توګه د پیسو اخیستل، ځورونه، وهل ټکول او سپکې سپورې بلل شوي دي.
یو شمېردغو چلوونکو ویلي د پولیسو زورزیاتي اړ کړل، چې "خپل کاروبار ودروي".
د افغانستان کورنیو چارو وزارت وايي، د بار وړونکو موټرو د چلوونکو شکایتونه دوی ته رسېدلي او په وینا یې، چې ډېر ژر به دغه ستونزې حل کړي.
دغه شکایتونه له کلونو راهیسې کېږي، خو څنګه چې یو شمېر چلوونکي وايي د چارواکو له ژمنو سره سره د هواري څرک یې نه لګي.
