روهي ( څلور نۍ / ۲۴ د مرغومي)، افغانستان کې د امریکا سفیر راس وېلسن وايي، امریکا په افغانستان کې د لنډمهاله حکومت پلوې نه ده.
د هغه په وینا، د افغانستان د سولې خبرو اترو پایلې په افغانانو پورې اړه لري او موږ باور لرو چې دا پایلې باید د افغانانو هیلې او ارمانونه منعکس کړي.
نوموړی په خپل رسمي ټویټر پاڼه لیکلي، " خلیلزاد او ما له افغانانو سره خبرې کړي دي او په دوحه کې د سولې د خبرو د لا زیات ګړندي کېدو لپاره خپلو خبرو ته دوام ورکوو".
د جمهور رئیس دوهم مرستیال، محمد سرور دانش نن د سولې چارو وزارت کې یوې غونډې ته وویل د اساسي قانون تعدیل د هغه د لغوه کېدو په معنا نه دی. دولت یا لنډمهالې اداره په بیړنیو شرایطو او سیاسي تشه کې مطرح کېږي. نن سولې ته د رسېدو لپاره لنډمهالي دولت ته په هیڅ توګه اړتیا نشته.
په کور دننه ځینو سیاسي چارواکو د موقت حکومت راتلو غوښتنه کړي او ویلي یې وو چې پرته له موقت حکومت سوله ناممکنه ده.
سرور دانش ویلي موږ په لومړي پړاو کې یو؛ خو د پایېدونکې سولې لپاره دوو خبرو ته پام مهم دی: د سولې هېڅ هوکړهلیک باید پټ موارد ونه لري او باید ټولو شخړهپاروونکو عواملو ته پام وشي.
دانش وویل چې پایېدونکې سوله باید پر نظم او جمهوریت باید ولاړه وي.
