روهي (څلورنۍ/۱۰ د مرغومي)، ټاکل شوې ده چې د راتلونکې ميلادي کال د جنوري مياشتې په پنځمه نېټه به د طالبانو او افغان حکومت د سولې مرکچي پلاوي د بين الافغاني خبرو دويم پړاو په دوحه کې پيل کړي.
د افغان حکومت مرکچي پلاوی وایي چې د جګړې غوڅ پرې کېدل يانې بشپړ اوربند او د جمهوري نظام ساتل د خبرو دا ځلې پړاو کې د دوی لپاره دوه اساسي مسايل دي.
د حکومت د مرکچي پلاوي مشر محمد معصوم ستانکزي د افغانستان د سټراټېژیکو مطالعاتو د انسټيټیوټ له لوري جوړه شوې ناسته کې ويلي، "لومړی د امنیت بحث دی چې د افغانستان د خلکو لپاره ډېر حساس او اهمیت لري. په دې دلیل چې د امنیت په بحث کې له اوربند څخه شروع د خلکو، لارو خوندیتوب او همدارنګه د نشه يي توکو مطرحه کول دي."
دوی ډاډ ورکوي چې په سولې مذاکراتو کې به د هېوادوالو ټول حقونه او دغه راز د جمهوریت نظام ساتل دوی ته مهم لومړيتوب وي.
د بين الافغاني خبرو په لومړي پړاو کې د طالبانو او حکومت مرکچي پلاوو يو او بل ته د هغه مسايلو نوملړ سپارلی وو، چې دويم پړاو کې به پرې بحث او خبرې وشي.
