روهي (درې نۍ/۲۱ د زمري)، ولسمشرۍ ماڼۍ د بي بي سي هغه راپور رد کړی دی چې ويلي وو په ۴۰۰ طالب بنديانو کې ۴۰ بهرني وګړي شامل دی.
د ولسمشر ویاند صدیق صدیقي ملي تلوېزیون ته وویل چې په هغو ۴۰۰ طالب بندیانو کې هیڅ بهرنی وګړی نشته چې د مشورتي لویې جرګې له پرېکړې وروسته به خوشې شي.
د سولې مشورتي لويې جرګې حکومت ته مشوره ورکړه چې د بين الافغاني خبرو د پيل او د سولې په پار دې د طالبانو ۴۰۰ بنديان له زندان ازاد کړي.
افغان ولسمشر محمد اشرف غني تېره ورځ د ځانګړو مراسمو په ترڅ کې هغه فرمان لاسليک کړ، چې له لارې به يې ۴۰۰ طالب بنديان خوشي شي.
