پسرلی وو ، ماښام باران اورېدلی وو ، د سهار نرم لمر ته د سترګو د لید په اندازه ګلبوټو خپلې غوټۍ غوړولې وې ، رنګونه په کې بېل بېل وو؛ د غره او د سمې د ټولو ګلانو استازیتوب یې درلود ،د هر رنګ ونډه په کې ښکاره وه ، په خپل ځای کې هر رنګ تر بل ښکلی وو ، د ګل ونه که ټیټه یا لوړه ، اوږد پاڼې او که لنډ پاڼې ، وړه ګلې او که لوی ګلې او لغړه که ببره وه ، د خبرو په کې څه نه وو ځګه چې دا د کایناتو منظمه مجموعه یا طبیعت وو.
خبره تر طبیعت راغله ، طبیعت یوازې تر بوټو پورې تړلی نه ښکاري، هغه د اسمان په لمنه کې مې د رنګونو په تړون د بوډۍ ټال وليد، رنګین ګنبد همدا شېبه کلي ته د راغلو مسافرو او مېلمنو د ښه راغلاست په پار خپله هنري بڼه د نندارې په موخه د ډېرو لنډو شېبو لپاره نېغ په نېغ وړاندې کوي،هېڅ سیموال یې له نندارې نه بې برخې کیږي او په همدې ځولۍ کې رالېږلې ټولې الهي ډالۍ د پېژندلو وړ دي.
د ورځې وروستۍ برخه ژېړه، د غرو له څوکو یې وروسته د الوت وزرونه ښکاره نه شول، خدای خبر چېرې به وي ،توره رنګه تیارې د همدې غرڅوکې څخه راته په رڼه اسمان وویل، هغه پسې مه ګرځه! د هغه چا نوم واخله چې مرګ او ژوند تاته درکوي، د ارام غېږې ته ځان وسپاره او د نویو هیلو د راټوکولو لپاره سترګې د سبا په لور پرانیزه.
په دې دعا سره ((ستاینه د وي دهغه چا لره چې له مړینې وروسته یې ژوندي کړو)) سپینې رڼا په ګړنګونو کې لار وموندله، چاپېریال د غوښتنې سره سم هرڅه ورسره مله شول، مرغانو د غږونوبېلا بېلې نغمې، د ګلانو په ګرېوان د بورا، شاپرک، غالبوزې، ملخ او نورو لوبې د ورځې شاهدي ویله، د بشري ټولنې په ګډون هرڅه په خپل رزق پسې سرګردانه شول، سهار پسې سهار په هماغه رنګ د وخت پانګه مخ ته وړله او وخت وړې برخې موږ ته د خطر زنګ وې چې پرته له لاس راوړنې په تور،سپین اوژېړو رنګونو کې په خپل لور تللې.
نو رنګونه :
- رنګونه د پېژندنې نښې نښانې دي ،رنګونه ځانګړنې دي او رنګونه هغه معیارونه دي چې زړه بایللي په کې ځانونه هم بایلي.
- رنګونه د انساني احساساتو ژبه ده چې له مخې یې خوښي اوخفګان ، درد او سکون ،بېلتون او وصال او نور څرګندوي.
- رنګونه د ښکلا د لېږدونې او ښکارونې وسیله ده، ریښتني ښکلا په جسم کې او رنګونه یې د ښکاره کېدو هنر دی.
- رنګونه دي چې کرکه په مینه او مینه په کرکه بدلوی شي.
- رنګونه مینه ګرکي د مينې د رنګین تار په دوه اړخو سره نښلوي چې کشول یې له سپڼسي د مزي جوړول دي.
- رنګونه د کایناتو د ښکلا راز دی چې د څېړلو لپاره انساني حواس ورګرځوي.
- رنګونه د خندا او ژړا انداز دواړه لري.
- رنګونه تر ډېرو جملو لنډ پیغام دی که د رنګ زړه ته لار ولرې.
- کېدای شي یو رنګ مو ارام او ډېر رنګونه مو متحرک کړي.
- رنګ په هر جسم کې یو عنوان دی.
- رنګونه سترګې له سترګو سترګو ته وړي.
- رنګونه دي چې ښه رنګ پېژنو.
- ښکلا او رنګ د هر انسان له اړخه بېل ليد د.
- په هرجسم کې تر هر څه مخکې رنګ لیدل کیږي.
اوس نو رنګونه د الله ج هغه نعمتونه دي؛ چې په انساني وجود کې د باصرې(لید) حس د همدې جوړښت د مشهورو غړو (سترګو) په وسیله پېژندل کیږي او د پېژندلو وړ دي او د انساني عقل سره دا مرسته کوي چې د مخ شي په وړاندې بې تفاوته پاتې شي ، یا غبرګون ښکاره کړي او یا هم د ژوندي ساتلو په لټه کې شي نو پر همدې اساس موږ ته په کار ده چې رنګونو په راکړه شکر وباسو.
