روهي (دوه نۍ/۱۸ د غبرګولي)، د جوړجاړي لوړې يا مصالحې عالي شورا مشر ډاکټر عبدالله عبدالله افغانستان کې د اسلامي همکاريو سازمان له سفير حسین آوني بوتسالي سره کتلي دي.
عبدالله عبدالله پر خپلې فېسبوک پاڼې ليکلي دي چې د اسلامي همکاريو سازمان د سياسي هوکړې له لاسليک او د مصالحې عالي شورا له جوړېدو ملاتړ اعلان کړی دی.
د اسلامي همکاريو سازمان سفير حسین آوني بوتسالي ډاکټر عبدالله عبدالله ته ويلي چې ياد سازمان به افغانستان کې د سولې او ثبات لپاره هر اړخيزې هڅې وکړي.
له دې وړاندې يو شمېر نورو هېوادونو او نړيوالو سازمانانو د ولسمشر محمد اشرف غني او عبدالله عبدالله ترمنځ د واک پر سر د سياسي هوکړې هرکلی کړی وو.
