تر اوسه کرونا ويروس سره مبارزې برخه کې افغان حکومت سره ۵۴۰ مېلېونه ډالر مرسته شوې، خو دا پيسې څه شوې؟
روهي (جمعه/۱۲ د غوايي)، د پيسو نړيوال صندوق په شمول د نړۍ يو شمېر سازمانونو تر اوسه کرونا ويروس سره د مبارزې برخه کې افغان حکومت سره ۵۴۰ مېلېونه امريکايي ډالر مرسته کړې ده.
نړيوال بانک ۱۵۰ مېلېونه امريکايي ډالر، اروپايي ټولنې ۱۱۵ مېلېونه ډالر، د پيسو نړيوال صندوق ۲۲۰ مېلېونه ډالر، د پراخيتا بانک ۵۰ مېلېونه ډالر د امريکا متحدو ايالتو حکومت ۲۵ مېلېونه ډالر تر اوسه افغان حکومت په تېرو دوه مياشتو کې ورکړي دي.
د دغه نيم مېلېارد ډارو مرستې سره تر اوسه د پلازمينې کابل په شمول د هېواد په ولايتونو کې د طبي وسايلو د کمښت، ماسکونو، دست کشو او نورو طبي وسايلو د نشتون شکايت کيږي.
له بلې خوا حکومت تر اوسه دوه ځلې د هغه کسانو لاس نيوی هغه هم يوازې په پلازمېنه کابل کې کړی دی چې د کرونا ويروس له امله په کورونو کې بند دي او اقتصادي وضعيت يې خراب دی.
لومړي افغان پر يو شمېر کابل ښاريانو څلور نيم - څلور نيم کيلو غنم ووېشل لو بيا تېره ورځ د کابل ښآر د ډوډۍ پخلنځيو له لارې د وچې ډوډۍ د وېش لړۍ پيل کړه.
افغان حکومت او په ځانګړي ډول مالي وزارت، روغتيا وزارت او د کرونا ويروس د مبارزې کميټه د پوره رڼوالي خبرې کوي، خو تر اوسه د ۵۴۰ مېلېونه امريکايي ډالره مرستې د مصرف ځای مالوم نه شو.
