روهي(یوه نۍ/۱۵ د مرغومی)، افغان ولسمشر محمد اشرف غني د یکشنبې پر ورځ له خپل ایراني سیال حسن روحاني سره تیلیفون خبرې کړې دي او "دوه ورځې وړاندې په بغداد کې د رامنځته شوې پېښې" له کبله ډاډګیرنه ورکړې او غمشریکې یې ورسره څرګنده کړې ده. که څه هم د ارګ اعلامیه کې د چا نوم نه دی اخیستل شوی، خو دوه ورخې وړاندې د ایران د القدس ځواک مشر جنرال قاسم سلیماني د بغداد هوایي ډګر کې د امریکا لخوا په یوه ډرون برید کې ووژل شو. په افغانستان کې هم د پخواني ولسمشر حامد کرزي او اجزائیه رئیس عبدالله عبدالله په ګډون یو شمېر سیاست والو له ایراني حکومت سره د جنرال سلیماني د وژل کېډو له کبله غمشریکي کړې وه. خو د افغانستان د ولسمشرۍ ماڼۍ لخوا په دې تړاو په لومړني غبرګون کې د غمشریکۍ څرګندونه نه وه شوې، او یوازې پر ایران او امریکا یې غږ کړی و چې خپلمنځي ستونزې د خبرو له لارې حل کړي. په هغه اعلامیه کې چې په دې تړاو نن یکشبه د ارګ لخوا خپره شوې، راغلي: "د افغانستان د اسلامي جمهوریت جمهور رئیس محمداشرف غني نن مازدیګر د ټلیفون پر لیکه د ایران د اسلامي جمهوریت جمهور رئیس حسن روحاني سره خبرې وکړې او هغه ته یې ډاډ ورکړ چې د افغانستان او امریکا متحده ایالتونو ترمنځ د امنیتي موافقتنامې په اساس د افغانستان خاوره هیڅ کله د بل هیواد پر خلاف نه استعمالېږي ". جنرال قاسم سلیماني دوه ورځې وړاندې په بغداد هوایي ډګر کې د امریکا لخوا په یوه ډرون برید کې ووژل شو. د ایران مذهبي مشر ایت الله خامنه یي سملاسي ګواښ وکړ چې له امریکا نه به د جنرال سلیماني د وژنې غچ اخلي. نن یکشنبه د ایران په بېلابېلو کې سلګونه زره خلک لارو کوڅو ته راوتلي وو او د جنرال قاسم سلیماني د مړي پاتې شونې یې لېږدولې، او د امریکا پر ضد یې شعارونه ورکول. خو د امریکا ولسمشر ډونلډ ټرمپ خبرداری ورکړی چې که ایران د جنرال سلیماني د وژنې په غبرګون کې پر امریکا برید وکړي نو له سخت غبرګون سره به مخ شي.
