روهي (جمعه/۱۳ د مرغومي)، تېره شپه بغداد کې د امريکا پوځ بې پېلوټه الوتکې په هوايي بريد کې د ايران د سپاه پاسدران ډلې د قدس بهرنۍ څانګې مشر قاسم سليماني ووژل شو.
د نوموړي وژنې نړيوال غبرګونونه راپورته کړي دي. ايران د غچ اخېستو ويلي دي او متحدو ايالتو هم د نوموړي د وژل کېدو مسووليت منلی دی.
روسيې، سوريې او عراق د ايران ولس ته تسليت ورکړی او د سليماني پر وژنې خپګان ښوودلی. د تيلو په نړيوال بازار کې د قاسم سليماني له وژل کېدو وروسته نن ورځ د تيلو بيې ۴ سلنه پورته شوې دي.
د ايران ستر مذهبي مشر ايت الله علي خامنه ای د خپل دغه قومندان د غچ اخېستو ويلي دي او درې ورځې يې په ټول ايران کې ملي ماتم اعلان کړ.
