روهي(پنځه نۍ/۱۲ د مرغومی)، د اسټرالیا لومړي وزیر سکاټ موریسن له هغه وروسته یوه ښارګوټي ته خپل سفر لنډ کړ، چې د سیمې ځینو اوسېدونکو یې نژدې ګرېوان ته لاس اچولی و. د نیو سوت ویلز ایالت کوبارګو ښارګوټي اوسېدونکي دا وروستیو کې د پراخې اور لګېدنې ته د حکومتي غبرګون له کبله غوسه وو. د پنجشنبې پر ورځ کله چې لومړی وزیر سکاټ مورېسن سیمې ته ورغی، ځایي خلک پرې راټول شول او په سختو الفاظو یې نوموړی اړ ایست چې له سیمې پښې سپکې کړي. د سیمې خلک وایي وايي، د دغې اورلګېدنې مخنیوي لپاره چې د اونۍ پیل کې یې دوه کسان وژلي او ګڼ نور یې بې کوره کړي، حکومت ناغیړي کړې ده. خو لومړی وزیر وايي د خلکو (غیر ارادي احساساتو) نه دی حیران کړی. کله چې لومړی وزیر د سیمې په سویل کې سمندر غاړې ته نژدې دغه ښارګوټي ته ورسېد، هلته ولاړو خلکو کې یوې ښځې پرې غږ وکړ: "زموږ د ښار دفاع لپاره ولې یوازې څلور لارۍ استول شوې، ځکه چې موږ ډېرې پېسې نه لرو؟ خو لومړی وزیره! زموږ زړونه د سرو زرو دي". کله چې لومړی وزیر د خلکو له دغې ډلې بېرته ستنېده، هلته نور کسان هم ورسېدل چې د نوموړي خلاف یې شعارونه ورکول او هغه یې (احمق) باله. بل لور ته د سیمې اداري مشر په ونو، بوټو کې د لګېدلي اور خطر ډېرېدو له کبله د یوې اوونۍ لپاره بیړنی حالت اعلان کړی دی. له سپتمبر میاشتې راهیسې په نیو سوت وېلز او ګاونډي ایالت ویکټوریا کې دغې اورلګېدنې ۱۸ کسان وژلي او نژدې ۱۲۰۰ کورونه یې په ایرو بدل کړي دي.
