د کرکټ فضلي د ستانکزي په منګولو کې
ليک: ډاکټر سيد نصيب الله
د افغانستان کرکټ بورډ اداره کې خوا و شا دوه سوه کسان په تېرو څو کلونو کې مقرر شوي دي، چې زيات شمېر کسان يې هېڅ کار نه لري، خو بس يا چيرمېن عاطف مشعل مقرر کړي و، يا هم اجراييه رييس شفيق ستانکزي مقرر کړي و.
که تاسې د هند په څېر لوى هېواد کرکټ بورډ ته وګورئ، نو خوا و شا تر پنځوس کسانو پورې به يې په کرکټ بورډ کې کار کوي او زموږ تر کرکټ بورډ يې لوبې ډېرې، کارونه ډېر او پرمختګونه هم ډېر دي، خو زموږ په کرکټ بورډ کې دوه سوه کسان مقرر شوي دي، بيا هم خېر و خېريت دى.
عاطف مشعل چې کله د کرکټ بورډ چيرمېن و، نو ډېرى کسان يې کرکټ بورډ کې مقرر کړل، خو چې کله له کرکټ بورډ څخه لاړ، نو ډېرى کسان يې پاتې شو او د ګوتو په شمېر ځينې کسان يې لاړ، همدا راز تر هغه مخکې نسيم دانش هم د خپلې خوښې کسان مقرر کړي و، په د دواړو په وختونو کې بيا په هماغه شمېر کسان اجراييه رييس شفيق ستانکزي مقرر کړي، خو چون د شفيق ستانکزي د وخت پوره کېدو نه وروسته هم هغه په کرکټ بورډ کې ناست دى، نو د هغه راوستي ټول کسان هم په کرکټ بورډ د بوج په څېر پراته دي.
کله چې کرکټ بورډ ته نوى چيرمېن عزيزالله فضلي راغى، نو ويل کېدل چې هغه غواړي يو لړ اصلاحات راولي، تر څو په کرکټ بورډ د ډېرو خلکو دا بوج کم شي او يواځې د ضرورت وړ کسان او تخنيکي کسان پرېږدي او نور ټول له کرکټ بورډ څخه ليرې کړي، خو مخې ته يې تر ټولو لوى خنډ د شفيق ستانکزي په څېره کې ودرېده، چې يې له دې کار څخه منع کړ.
په کرکټ بورډ کې يو ډېر نږدې کس راته وويل، چې اجراييه رييس شفيق ستانکزي په کرکټ بورډ کې يوه داسې مافيا جوړه کړې ده، چې هر چيرمېن راځي، لومړى ورسره خپل زور ازمايي او وروسته ورسره بيا يو ځاى کېني او ورته وايي، چې بس په ما کار مه لره، په تا کار نه لرم.
د نسيم دانش نه راواخله تر عاطف مشعل پورې د شفيق ستانکزي له دواړو سره وخت په وخت لانجې راغلي دي او وخت په وخت سره بېرته يو ځاى شوي دي، د دوى ترمنځ ډېرې کيسې هم فېسبوکونو ته وخت په وخت راووتلې، خو بيا به هم دوى هر څه بېرته پټ کړل.
اوس د کرکټ بورډ نوى چيرمېن عزيز الله فضلي هم د شفيق ستانکزي په منګولو کې راګېر دى، که د شفيق ستانکزي راوستي کسان له کرکټ بورډ څخه ليرې کوي، نو يې مخې ته ودرېږي او پر ضد يې منفي تبليغات پيلوي، که يې نه لرې کوي نو په کرکټ بورډ د بېځايه کسانو بوج همداسې پاتې کېږي.
په کرکټ بورډ کې يوازې د چيرمېن په بدلولو باندې څه نه کېږي، بايد دا ځل اجراييه رييس هم بدل شي، او نه يوازې شفيق ستانکزى له دندې ليرې شي، بلکې ورسره هغه ټول کسان هم دې له دندو ليرې شي، چې په تېرو کلونو کې شفيق ستانکزي کرکټ بورډ ته راوستي او دلته يې مقرر کړي.
تر څو چې شفيق ستانکزى له کرکټ بورډ څخه نه وي ليرې شوى، تر هغې پورې په کرکټ بورډ کې اصلاحات راوستل ممکن نه دي.
