(روهي ـ ۱۳۹۶لمریز، سلواغې ۳مه) د ملګرو ملتونو امنیت شورا تازه یوه اعلامیه خپره کړېو چې په کې یي په کابل کې پر انټرکانټیننټال هوټل وروستی برید په کلکه غندلی دی.
د امنیت شورا غړو پهدې اعلامیه کې د افغانستان او نورو هغو هېوادونو حکومتونو سره چې اتباعیې پهدې پېښه کې وژل شوي، خواخوږي ښودلې ده.
دغې شورا غړو یو ځل بیا ترورېزم د ټولې نړۍ د ثبات او امنیت لپاره یو جدي ګواښ بللی دی.
امنیت شورا یو وار بیا په دې اړه ټینګار وکړ چې د دې ډول ترورېستي اقداماتو له ملاتړو، تمویلوونکو او پلانوونکو سره باید حساب وشي او عدالت ته راوستل شي.
د خپرې شوې اعلامیې له مخې، له ټولو هېوادونو غوښتنه شوې چې د نړیوالو اصولو او خپلو مسوولیتونو له مخې پهدې برخه کې له افغان حکومت سره مرسته وکړي.
