نن د سما ښاپېرۍ
ډېوه په لاس کې سرې لمبې لټوي
د يوې مور د ارمانونو سرې غونچې لټوي
د يوې ښکلې او نازکې هيلې وروستۍ شېبې لټوي
نن د سما ښاپېرۍ
د جنتونو په غېږ د سرو لمبو په ګلبڼ
د ګلابونو پر مخ سپرغۍ د سرې بلې ډېوې لټوي
د مرور او ځورېدلي رشاد
خوارې لېمې لټوي
نن د سما ښاپېرۍ
د جنت حورو د قسمت پر دښته
د سرو غاټولو د زړګو په داغو
پټۍ د پرخو په دعا لګوي
نن درشاد پر سينه د پرهرونو
سرې غونچې لټوي
نن د سما ښاپېرۍ
د جنت حورو په سپېنچکو وزرو
د شهيدانو دسرو وينو لګيدلي تپېو
دمخ حجاب لټوي
دا د مور مړي او سپېڅلي رشاد
د روح وزر لټوي
نن دسما ښاپېرۍ
ډېوه په لاس کې سرې لمبې لټوي
د يوې مور د ارمانونوسرې غونچې لټوي
د يوې ښکلې او نازکې هيلې روستۍ شېبې لټوي
نن د سما ښاپېرۍ ډېوه په لاس
تنکی رشاد لټوي
تنکی رشاد لټوي
هغه سپيڅلي ماشوم (( رشاد)) ته ، چې دروان کال د جدي په اته ويشتمه يې د کابل ښار په جګړه کې خپل وړوکی ټټر د مرميو سپر کړ.
________________________________________
