الحاج الهام الدين قيام
د ټولټاکنو د پای ته رسيدو نه وروسته ، د رايو ډک صندوقونه د اړوندو حوزو څخه د رايو د شمېر مرکز ته رسيدلي وو ، د ټولټاکنو د خپلواک کمسيون کارکوونکو يو بل پسې د رايو په شمېر پسې اخته وو .
د يوې حوزې څخه د رارسيدلي صندوق رايې وشمېرل شوې او اعلان وشو ، چې په مجموعي توګه 25135 رايې په کې موجودې وې .
دلته د همدې کميسيون يو ټيت رتبه کارکوونکی وﻻړ و ، چې د همدې انتخاباتي حوزې په مربوطاتو کې اوسيده . دی په فکر کې ډوب شو او له ځانه سره يې سوچ وکړ ، چې ياخدايه زموږ د حوزې په مربوطاتو کې خو دومره خلک نه اوسيږي او دا رايې خو د دې حوزې له نفوس سره هېڅ تناسب نه لري او له حده زياتې دي .
له خپل يوه مشر همکار سره يې خبره شريکه کړه او ترې يې وپوښتل ، چې دا څنګه کيدی شي ؟!
هغه په مفصله توګه ورته تشريح کړه ، چې : اې بې عقله ! د طالبانو له ګواښ نه خبر نه يې ، چې که څوک په ټاکنو کې برخه واخلي ګوته به يې پرې شي او ……..
همدا علت دی ، چې ددې صندوق د رايو شمېر د حوزې د اوسيدونکو له شمېر سره تناسب نه لري !!!
الحاج الهام الدين قيام
